Амер се вратил од Германија во струшко, а денес има фарма со крави: „Сите што мислат дека има подобро од овде, се лажат“

Дали освен млечни производи на вашата фарма има и други производи? Што одгледувате најчесто?

Моментално произведуваме само млечни производи бидејќи е многу тешко да се занимаваш во исто време со повеќе работи, така што сè друго е елиминирано.

Има ли денови за одмор кога се занимаваш со сточарство?

Секако, ако го организираш времето има и такви денови кога може да си дозволиме одмор.

Се разбира, не може долго да бидеш отсутен бидејќи добитокот трипати на ден сака храна и вода.

Кои производи ви се најбарани?

Најбаран производ ни е кравјата маст (путер). И другите производи се бараат, но неа може да ја одвоиме бидејќи е навистина нешто што вреди.

Кој ти помага околу фармата, имаш ли вработени или сè работиш сам?

Околу фармата ми помага моето семејство, и тоа најчесто за молзењето и хранењето на добитокот, а другите работи претежно ги вршам јас.

Може ли во Македонија да се опстане само со сточарство и земјоделие?

Не знам зошто луѓето се жалат и ја гледаат само лошата страна на работите.

Јас можам, барем за себе, да кажам дека многу убаво може да се живее и заработува во Македонија од земјоделство, особено во последните години кога сè повеќе изумира оваа работа.

Со оглед на тоа што претходно си живеел во странство, што би им порачал на луѓето што размислуваат да си заминат одовде и среќата да си ја побараат на друго место?

За сите други кои планираат да ја напуштат земјава мислејќи дека има подобро од овде, треба да знаат дека се лажат, бидејќи без работа во странство не може да се живее како тука.

Оваа слобода човек не може да ја има никаде освен тука, така што само треба човек малку да ја гледа реалната слика на животот и да работи, а сè после тоа е полесно.

Но, сепак, треба да се вложи труд, а плодот после тоа доаѓа.

©CRNOBELO.com Забрането преземање и копирање. Крадењето на авторски текстови е казниво со закон.

Б. С. Б. | Црнобело