Тијана од Кавадарци, тапанарка: „Луѓето се восхитуваат кога ќе видат девојка со традиционален тапан на свадби“

Детали

вторник, 26 ноември 2024

„Најголема желба ми е да се запознаам и да настапувам со Тијана Дапчевиќ – мајка ми е нејзин голем обожавател и затоа го носам името по неа“, вели кавадарчанката Тијана Илова која свири на ударни инструменти, а препознатлива е по традиционалниот тапан.

Тијана Илова од Кавадарци, која студира економија, може да се пофали со врвен талент за ударни инструменти.

Нејзината специјалност е традиционалниот македонски тапан – инструментот со кој застана на сцена со познатата група „Меморија“.

20-годишната кавадарчанка го наследила талентот од дедо ѝ, а вели кога во детството одела кај него на гости, скришно го земала неговиот тапан за да свири.

Кога нејзиниот талент бил забележан од семејството, Тијана го добила својот прв инструмент и почнала да ја гради музичката кариера.

Во разговор со CRNOBELO.com, Тијана открива повеќе детали за неа и љубовта кон музиката, но и раскажува за настапот на концертот на „Меморија“.

Целото интервју во продолжение:

Од каде потекнуваат желбата и интересот за ударни инструменти и дали знаеш да свириш и на некој друг?

Желбата за ударни инструменти ја добив уште од мали години, кога го гледав мојот дедо како свири.

Свирам само на ударни инструменти, не свирам на друг инструмент, но би сакала да научам гитара, зошто да не.

Желбата и интересот ги имам од првата средба со традиционалниот тапан, кога го видов првпат.

Како мала многу го гледав ансамблот „Танец“ и обожавав македонска народна музика.

Колку време свириш на ударни инструменти и каде научи?

Со ударни инструменти и музика, професионално се занимавам веќе 5 години. Мојот дедо е тапанар и тој свирел претходно со група.

Кога одев кај баба ми и дедо ми на гости, тајно се криев и кога бев сама го земав инструментот за да отсвирам нешто.

Не го искажував талентот пред никој, сè додека мајка ми не ме забележа како импровизирав свои ударалки направени од моливи и фломастери.

Потоа мојата баба Трајанка за изненадување ми го купи првиот тапан.

На една домашна прослава, дедо ми ми рече: „Ајде дедо отсвири ми нешто да видам што знаеш…“ Кога ме слушна, ме застана и ми рече „повели мојот тапан е сега твој и со среќа“. И, оттогаш почна приказната.

Инструментот го изучив сама, по слух, а за некои тешкотии се консултирам со мои колеги, поискусни музичари.

Кој ти е омилениот ударен инструмент (и зошто) и на што свириш најчесто?

Омилен ударен инструмент ми е традиционалниот тапан бидејќи е прв инструмент со кој имам настапувано и е моја таканаречена прва љубов.

Најчесто кога настапувам со бендот го користам ударниот инструмент кахон затоа што свириме акустика, а кога настапувам на свадби, свирам со тапанот и кога има побарувачка свирам и со тапаните.

Продолжува на следната страница...