Михајло Блажески, тату артист: „Омилено ми е да тетовирам портрети и колку покомплицирани - толку подобро“

Детали

среда, 27 ноември 2024

 „Омилени тетоважи ми се портрети од спортисти, особено познати кошаркари, бидејќи кошарката ми е пасија, но исто така и тетоважи со ликови од познатите филмови, некои историски личности, митологија, херои од видеоигрите, теми од животинскиот свет“, вели Михајло Блажески, тату артист од Скопје, за CRNOBELO.com.

Михајло Блажески e тату артист од Скопје, кој се занимава со тетовирање веќе 9 години.

Тој вели дека колку некоја тетоважа е покомплицирана, толку му е поголем предизвик.

За својата работа за CRNOBELO.com вели:

„Со тетовирање се занимавам од 2016 година, но цртам од кога знам за себе и цел живот работам нешто поврзано со уметноста.

Пред да започнам да се занимавам со тетовирање, работев како графички дизајнер и илустратор петнаесетина години, тоа ми е и струка бидејќи имам завршено ликовна академија, отсек графика со графички дизајн.

Но, мора да кажам дека никогаш целосно не се пронајдов во дизајнот, го работев повеќе бидејќи ми даваше некаков комфор, но отсекогаш сум сакал да цртам, „олдскул“ на лист, не на компјутер или таблет каде има многу алатки што ти ја олеснуваат работата.

Во тетовирањето нема помош, нема простор за грешка, или те бидува или не.

Тука морам да му се заблагодарам на мојот другар, сега и бизнис партнер Роберт Китановски од Скопје Инк, кој со години ме убедуваше да почнам да тетовирам, и многу ми е драго што успеа да ме убеди, бидејќи навистина уживам во оваа работа, а и самата тату индустрија се промени многу во позитивна смисла.

Се подобри и од технички аспект како поквалитетни бои, машинки, продукти за нега, но исто така и перцепцијата на луѓето кон тетоважите е поинаква сега, особено тука кај нас, бидејќи во западниот свет одамна е така.

Се сметам за прилично добар артист општо, но сепак омилен стил и тоа што најчесто го работам и го правам со најголемо задоволство е „блек енд греј“ реализам.

Омилени ми се портрети од спортисти, особено познати кошаркари, бидејќи кошарката ми е уште една пасија, но исто така и тетоважи со ликови од познатите филмови, некои историски личности, митологија, херои од видеоигрите, теми од животинскиот свет.

Продолжува на следната страница...