Александра од Скопје, мајка што постојано се качува на Водно со синот (3): „Го носев во кенгур на Водно уште од бебе“

Детали

четврток, 12 декември 2024

„Првата работа која бев возбудена да ја купам додека бев бремена беше ранецот-носилка за планинарење. Неколку месеци по раѓањето синот Давид го носев во кенгур на Водно и веќе од 5/6 месечна возраст почнав да го носам во ранецот-носилка“, споделува Александра од Скопје за CRNOBELO.com.

Александра од Скопје е сопруга, мајка на Давид (3), економист, сопственик на мал бизнис (@nallathepittieshop) и голем љубител на планините.

Таа инспирира со својата љубов кон Водно и со тоа како не дозволила таа нејзина љубов да згасне дури и кога била на породилно отсуство и нејзиниот син бил навистина мал.

Александра постојано го носела Давид на Водно уште од 5/6 месечна возраст во ранец-носилка, а таа нивна практика не сопира ниту денес, кога тој има 3 години и 15 килограми, иако сега и самиот успева да искачи дел од патот до врвот на Водно.

Александра споделува детали за CRNOBELO.com за оваа нејзина навика:

„Омилен дел од животот моментално ми е квалитетно поминатото време со моето дете кое ќе создаде доверба, сигурност и блискост помеѓу нас.

Децата треба да поминуваат што повеќе време во природа и да ја истражуваат во безбедни услови.

Сензорната игра во природа ја зајакнува стабилноста, ги развива моторичките вештини и го подобрува имунитетот кај децата.

Мислам дека првата работа за која бев возбудена да ја купам уште додека бев бремена беше ранецот-носилка за планинарење.

Првото одење со Давид до Милениумскиот крст на Водно беше со количка по асфалтната патека, бидејќи тој имаше само два месеци.

Потоа, неколку месеци го носев во кенгур и веќе од пет/шест месеци почнав да го носам во ранецот-носилка.

Првата година многу често го качувавме Водно, неколкупати неделно.

Давид си спиеше во кенгурот или ранецот-носилка, па горе си уживавме двајцата во појадокот и мама на раат во природа со утринско кафе.

Откако Давид почна да оди во градинка, ни останаа викендите и се трудам доколку немаме други обврски да биде одење на Водно.

Многу се радувам што одењето во природа му е нешто нормално, се радува кога го спремам ранецот, а бидејќи сега е голем поголем дел од патот го оди сам до Средно Водно.

Продолжува на следната страница...