Даниел е сопственик на ресторан во Германија: „Ништо не беше преку ноќ и на среќа - ова беше борба цели 5 години“

Детали

недела, 13 април 2025

„Идејата да отворам ресторан во Германија ми беше уште од првиот ден кога се преселив тука. Служиме тавче-гравче, скара и македонско грне“, вели Даниел Петровски (37) за CRNOBELO.com, кој е сопственик на ресторанот „Scala Coffee & Restaurant Hanau“ во германскиот град Ханау.

Даниел Петровски (37), од Валандово, е Македонец на кој веќе 7 години Германија му е дом. Таму, тој е сопственик на ресторан, кој го работи заедно со сопругата.

Даниел како професија го избрал угостителство и повеќе од 2 години успешно го води ресторанот „Scala Coffee & Restaurant Hanau“ во градот Ханау.

Ханау е блиску до Франкфурт на Мајна, односно на околу 25 километри источно, и е познат и како родно место на браќата Грим.

Градот Ханау има околу 100.000 жители, со што спаѓа во редот на средно големи градови во Германија.

фото: depositphotos.com

Ханау е важен индустриски и културен центар во регионот, а поради близината до Франкфурт, многу луѓе работат во Франкфурт, а живеат во Ханау.

Исто така, има мешана популација со голем број доселеници, меѓу кои и многу луѓе од Балканот.

фото: depositphotos.com

Даниел вели дека за да го реализира својот сон да има ресторан во Германија му биле потребни 5 години и воопшто не било лесно.

Со Даниел поразговаравме за неговиот ресторан во Германија:

„Идејата да отворам ресторан ми беше уште од првиот ден кога дојдов во Германија, ама не беше така лесно како што мислев.

Требаше малку повеќе време додека да се реализира – околу 5 години постојано барав соодветна локација.

Секогаш барав добра локација, со убава тераса и со сè што ми беше важно, ама секогаш нешто недостигаше.

Ништо не беше преку ноќ и на среќа – ова беше борба и истрајност.

Сум бил на преку 100 термини за гледање објекти. И така, еден ден дојдов на термин да го видам ова место и веднаш знаев дека тоа е тоа што го барам и тоа што го сакам.

Постапката за отворање ресторан е сложена, има многу документи за пополнување, ама сè може да се реши.

Јас го завршив тоа за 4-5 месеци, додека паралелно се реновираше и ресторанот.

Продолжува на следната страница...