Драгана Бебекоска за родниот крај: „Во Вевчани како деца игравме кришмиш, сакам и ќерка ми да има детство како моето“

Детали

петок, 17 октомври 2025

„Во детството најубавите денови ги поминувавме со игрите надвор. Игравме криенка, но и „криенка со план“ – кај нас познати како кришмиш и кришмиш со план. Секој ден бевме надвор, игравме ластик, брканица, возевме велосипеди, а зимно време уживавме во санкање и го чекавме василичарскиот карневал“, вели Драгана Бебекоска Костојчиноска (35) за CRNOBELO.com за родниот крај.

Драгана Бебекоска Костојчиноска (35)  по професија е менаџер за осигурување, а работи во здравствена установа.

Таа е родена во Вевчани, а сега таму гради живот со сопругот и ќерката и посакува ќерка ѝ да има детство буквално исто како нејзиното.

За љубовта кон родниот крај, Драгана споделува за CRNOBELO.com:

„Родена сум во Вевчани, тука пораснав и тука и денес живеам заедно со мојот сопруг и нашата ќерка.

Иако сакам да патувам и да откривам нови места, секогаш со најголемо задоволство се враќам во моето Вевчани – местото кое ми е корен, инспирација и мир.

Во детството најубавите денови ги поминувавме со игрите надвор. Игравме криенка, но и „криенка со план“ – кај нас познати како кришмиш и кришмиш со план.

Секој ден бевме надвор, игравме ластик, брканица, возевме велосипеди, а зимно време уживавме во санкање.

Правевме „воз“ од санки и заедно се спуштавме по снежните улици. Летото пак беше посебна приказна – беревме овошки директно од градините и природата: муренки, капинки, цреши, сливи, круши… вистинско богатство на вкусови и моменти.

Тоа беа безгрижни и топли денови што секогаш ќе ги паметам, а денес најмногу посакувам мојата ќерка да има детство исполнето со истата слобода и радост.

Во зима, пак, најмногу го чекавме празникот Свети Василиј – нашиот прочуен василичарски карневал.

Продолжува на следната страница...