Бубе Јаневска за стилот и убавината: „Имам над 35 сакоа, откако пијам 2.5l вода дневно имам поубава кожа и коса“

Нега на лицето и телото

Со оглед дека од 7 дена во неделата, пет сум пред камера, тоа значи дека сум со пудра и шминка која ја носам повеќе од 6 часа.

Така веќе со години, па затоа грижата за лицето е најважниот сегмент. Но, и косата.

Грижата им ја препуштам на професионалци кои не ги менувам веќе 20 години затоа што знаат што и како треба, но и низ годиниве ги знаат сите промени.

Секогаш темелно чистење на лицето, по вадењето на шминката и употреба на дневна и ноќна крема, и серум еднаш до двапати неделно. Тоа е мојата рутина.

Никогаш во животот немам легнато со шминка, па дури ни со маскара на очите. Ова го потенцирам затоа што сум слушала како си легнуваат со шминка на очи, со маскара на трепки.

И уште една многу важна работа е хидратацијата. Порано не пиев доволно вода и поради тоа лицето и кожата ми изгледаа ужасно.

Кога ќе нанесев пудра, тоа изгледаше уште полошо. Нон-стоп менував пудри бидејќи бев убедена дека не можам да ја најдам соодветната за моето лице.

Но, кога почнав да внесувам 2.5 литри вода дневно, сѐ се промени. И косата, и кожата и лицето.

Начин на исхрана

Од што не внимавав, пак сум на исхрана кај мојата Емилија. Не можам да одолеам на тесто, тестенини и тие на долг рок си носат проблеми.

Но, со правилен начин на исхрана, некогаш и да направиш грев не е страшно. Не сум зависник од слатки, можам без нив, а најмалку што јадам се грицки.

Во суштина, треба да се биде умерен во сѐ. Сега сум на исхрана која ми ја прави нутриционист и морам да кажам дека одлично ми оди.

Чувството кога ги губиш сантиметрите во обем е прекрасно и мотивирачки. Програмата е според сѐ она што јас сакам да го јадам. Не сакам полнети пиперки и затоа ги нема на мени.

Многу сакам да готвам и тоа го правам често, иако имам помош и од свекрва ми во деновите кога сум попладневна смена на работа.

Уживам кога сум во кујната и кога имаме ‘домашни забави’, а најчесто тоа што е ставено на масата е подготвено од мене.

Сега се учам да правам суши затоа што на ќерката Нела тоа ѝ е омилено јадење.

Вежбање и фитнес рутина

Со оглед дека физички сум активна речиси целиот мој живот, по еден период на „мрза“ сега сум повторно физички активна.

Функционален тренинг/фитнес е мојот избор и вистински уживам додека спортувам. Одамна се пронајдов во овој начин на спортување.

Еден час интензивен тренинг е доволен за да се ослободиш од стресот, да ја исфрлиш од себе негативната енергија и потоа да се чувствуваш прекрасно.

Сѐ уште немам доволно кондиција за да го дадам максимумот, но секој тренинг сѐ повеќе напредувам.

Спортот во комбинација со исхраната е најдоброто нешто што можам да му го дадам на моето тело и на моето здравје и навистина се гордеам со себе.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело