Никола Поповиќ за 8 месеци стана популарен јутјубер: „Снимам од октомври 2025, се заработува добро“

Детали

среда, 24 јуни 2026

„Првото видеото беше забавен скеч, каде јас и мој другар бевме „лажни полицајци“. Се обидувавме да направиме интересен концепт, па запиравме aвтомобили и пешаци на улица и ги стававме во различни ситуации. Целта беше да е забавно, спонтано и различно од вообичаените видеа“, вели младиот јутјубер и инфлуенсер Никола Поповиќ за CRNOBELO.com.

Никола Поповиќ (19) од Скопје од ден на ден станува сè попопуларен, особено меѓу помладата публика на социјалните мрежи, но пофалби добива и од повозрасните.

Тој активно креира содржини на социјалните мрежи како инфлуенсер и јутјубер, но организира и различни настани.

Истовремено, Никола студира на Бизнис факултет, каде што ги надградува своите знаења од областа на бизнисот и претприемништвото.

Сепак, во моментов фокусот му е свртен кон Јутјуб, Инстаграм и ТикТок, каде што, освен што споделува забавни содржини, објавува и видеа со социјални експерименти, а еден од последните е за тоа како реагираат луѓето кога пред нивните очи маж малтретира и се заканува на девојка.

Никола, за CRNOBELO.com, вели дека сака да создава квалитетна содржина што ќе им се допадне или ќе ги инспирира луѓето, но сепак се соочува и со критики за својата работа.

За тоа како „преку ноќ“ со неколку интересни видеа луѓето почнаа да го забележуваат, за првото видео, но и непријатности што се случуваат при снимањето, Никола, кој на Инстаграм е познат како @popovic.official, открива во интервјуто за CRNOBELO.com:

Пред колку време почна да снимаш видеа за Јутјуб, а потоа и за Инста? Ти беше ли тешко додека да се решиш да го објавиш првото?

Со снимање видеа на Јутјуб почнав кон крајот на октомври, односно почетокот на ноември.

Во исто време почнав да објавувам содржини и на Инстаграм и ТикТок, затоа што денес сите платформи се поврзани и сметам дека едната ја надополнува другата.

Искрено, сè започна многу спонтано. Немав некој голем план однапред да станам јутјубер или инфлуенсер.

Едноставно ми дојде идеја за интересно прво видео, „24 часа полицаец“.

Ми изгледаше како нешто што ќе биде забавно за гледање и решив да го снимам.

Уште од самото објавување видеото почна да привлекува внимание и да добива добри прегледи.

Мислам дека причината беше тоа што темата беше интересна, а во видеото вложив многу труд, време и енергија.

Кога ги видов првите резултати и реакциите од луѓето, добив дополнителна мотивација да продолжам и да создавам нови содржини.

Така што, мојот почеток на социјалните мрежи беше целосно спонтан, но токму тоа прво видео ми покажа дека ова е нешто со кое сакам сериозно да се занимавам.

Се сеќаваш ли колку пати го преснимуваше или ја објави првата верзија?

Искрено, не правев повеќе верзии и не го преснимував видеото - ја објавивме првичната верзија.

Содржината на видеото беше во форма на забавен пранк/скеч, каде јас и мојот другар бевме во улога на „лажни полицајци“.

Се обидувавме да направиме интересен концепт, па запиравме луѓе на улица - и автомобили и пешаци - и ги стававме во различни ситуации за реакција.

Целта беше да биде забавно, спонтано и различно од вообичаените видеа, и мислам дека токму таа природност го направи видеото интересно за публиката.

Продолжува на следната страница...