Излезете од секојдневната монотонија и запознајте ги дечките од „Флека“ и нивните скечеви

Детали

петок, 24 август 2018

Сите имаме моменти кога со своите блиски сакаме да се „глупираме“, да ги извадиме од себеси и околината нештата со кои можеме да се мајтапиме на нивна сметка.

Е, па, нешто во овој стил се почетоците на Флека, јутуб канал за хумористични видеа составен од тројца шегаџии: Марко Џамбазоски (25), дипломиран филмски и ТВ монтажер и дел од македонскиот алтернативен рок бенд Визија, Александар Алексовски (26), недипломиран ФИНКАШ, кој се занимава со актерство, фотографија и Марко Гапо (25), магистар на Факултетот за музичка уметност, кој не знае каде тера со животот, а во слободно време скита па планини, улици и пее во бендот Визија.

„Под името Флека се оформивме во далечната 2016. И бездруго, постојано си правевме слични „глупирања“, па решивме тоа да почнеме да го правиме пред камера. Затоа се собравме во нашите канцеларии (подрумот на Аце) кај што почнавме да ги смислуваме нашите први идеи. Бевме инспирирани од нашето секојдневие, а по малку бевме и бесни на монотонијата која владее во нашето општество и сакавме да направиме нешто различно, нешто што ќе нè размрда и нас, но и публиката.

Но, пред да почнеме да снимаме моравме да имаме име, па така собрани си рековме „Како ќе се викаме?“ Во истиот момент еден од нас посочи кон бемка на ногата и рече „Ај да се викаме бемка!“ Друг одговори „Не, ај Флека!“ И наеднаш сите се согласивме. Побрза одлука никогаш не сме донеле.“, раскажуваат членовите на Флека за нивните почетоците, кои велат дека за нив хуморот претставува начин на изразување и излез од секојдневната монотонија.

„На македонската публика пред сè и недостасува хуморот - воопшто. Луѓето, поради времето во кое живееме, секојдневно се оптоварени со сериозни политички теми, а хуморот е единствено нешто кое може да им понуди излез од македонското секојдневие. Хуморот е алатка за спас од монотонијата која владее“, се изјаснуваат шегобијците.

Тимот на Флека во моментот работат на нивен прв професионален ангажман, односно рекламна кампања за подигнување на свеста за рециклирање во соработка со Пакомак.

Напоредно со тоа, ги планираат и нивните наредни видеа кои наскоро ќе бидат снимени и објавени на нивниот јутуб канал. Ако до сега немате погледнато видео од Флека, во истиот момент оставете сé што работите и сторете го тоа!

Автор: Евгениј Хоуп | Црнобело