Интервју со Стефанија Димеска (27), најмладата жена пилот во Македонија: „Нашата држава е прекрасна гледана одозгора“

Си имала ли непријатна случка при некој лет?

Непријатна случка при лет сум имала да, но сум успеала да се снајдам добро и сум горда на тоа.

Како изгледа еден твој работен ден?

Па, доколку имам лет правам подготовка дента пред тој лет. Си подготвувам рута каде би летала, гледам време какво ќе биде, на појдовниот и дојдовниот аеродром. Правам процена за времетраењето на летот, пресметки за гориво и тежина, или со други зборови „Mass and balance“. Читам повторно за авионот кој треба да го летам.

На денот на летот доаѓам одморена, си го подготвувам авионот и сите потребни предполетни проверки ги правам. Кога ќе дојдат пријателите за летање си разговараме да се опуштиме и потоа се подготвуваме сите и тргаме. Доколку немам лет, тогаш помагам во сервисот, во однос на документација и некои инженерски пресметки доколку има потреба.

Колку е од голема важност контролата на летање?

Контролата на летање е од круцијална важност бидејќи тие се луѓето кои нè водат низ воздушниот простор. Тие се другите очи и уши за нас.

Чувството кога си над облаците…

Доста често ми го поставуваат ова прашање, но никако не можам да го најдам вистинскиот одговор бидејќи е неописливо. Замислете си како се чувствувате кога сте со вашата омилена личност или кога ја јадете вашата омилена храна, го возите вашето омилено возило или мотор … Е тоа е тоа чувство, чувство на слобода и уживање!

Каква е Македонија кога ја гледаш одгоре? Што паѓа најмногу во очи?

Нашата земја е прекрасна гледана одозгора. Многубројни планини, котлини, полиња, разни бои во различно време од годината. Најмногу паѓаат во очи планинските врвови и котлините. Зима и снежните падини, есен со најубавите бои. Малите планински села, теченијата на реките.

Многу интересно ми е кога сум во воздух да ги „набљудувам“ селата одозгора, работниците по нивите, животните по пасиштата и некој пат децата кои ги поздравуваат авионите што поминуваат над нив.

Да не беше пилот, ќе беше …

Па, да не бев пилот ќе бев аеро инженер. Повторно нешто поврзано со авијацијата и инженерството. Ни таа опција не ми е исклучена со оглед на мојата професија, дипломиран машински инженер по мехатроника.

Колку копилотот е значаен при летот? Си имала ли конфликт со некого околу начинот на летање?

Копилотот е значаен исто колку и пилотот, не за џабе се и двајца пилоти во кокпитот на авионот. И двајцата имаат подеднакви активности со некои разлики во однос на функцијата, но сепак задачата е безбеден и удобен лет за сите.

Не можам да кажам дека сум имала конфликт бидејќи тоа е многу дискутабилно, но секогаш постојат разлики во летањето. Односно секој си има свој начин на летање. Не би го нарекла како конфликт, туку различен пристап и однос кон летањето.

Продолжува на следната страна...