Двајца Македонци искрено за работата на брод: „Зошто заминавме на печалба?“

Срѓан Глигориевски: Најтешко е што ми недостасуваат блиските

Желбата за патувања и запознавање на светот го однела младиот Срѓан Глигориевски во светот на модерните морнари и бродски авантури. Изработил четири договори, два за MSC Cruises и два за Viking Cruises.

„Желбата за работа на брод ми се роди уште од мали нозе. Сакав да го видам светот и да запознаам нови култури.

Исконтактирав неколку агенции во Македонија, но имав и блиски кои работеа на брод и го споделуваа нивното искуство со мене, па знаев што да очекувам од работењето на брод“ – вели Срѓан за почетоците на својата бродска кариера.

Тој појаснува дека првото интервју му било за MSC Cruises, и бидејќи немал доволно искуство му дале ниска позиција, како bar boy, помошник во бар, но ја прифатил бидејќи видел можност за учење и професионално надоградување.

По две години добил понуда за работа на Viking Cruises како келнер во бар која веднаш ја прифатил.

За него најголемата придобивка од работењето на брод е можноста за патување и секако запознавањето нови култури и луѓе.

„Работењето на брод има повеќе придобивки, но најголемата дефинитвно е патувањето. Исто така и запознавањето нови личности, со кои до денес сум во контакт и кои можам да ги наречам пријатели. А и финансиската заработка е добра придобивка“.

Од друга страна пак, единствената лоша страна, за Срѓан, е разделеноста од семејството и блиските. Па, вели секое слободно време го користел да најде добра интернет конекција и да се слушне со своите сакани.

Од своето досегашно искуство со работењето на брод вели дека научил многу, се надоградил во работата, но и во приватниот живот.

Научил многу за други култури и нови јазици, а додава дека му е важно што имал вистинско интернационално работно искуство со колеги од целиот крај на светот, од кои учел не само за професијата, тука и за нивниот начин на живот, традиции и навики.

На прашањето за враќањето на брод Срѓан вели дека ќе почека да се смири светската пандемија, па најверојатно во следната година повторно ќе ги спакува куферите и ќе заплови.

Овој млад морепловец вели дека досега има посетено околу 40 земји на четири континенти.

„Омилено место? Тоа е најтешкото прашање што секој ми го поставува. Секое место коешто го посетив ми беше убаво на свој начин, но ако морам да издвојам, Шангај, Хонгконг, Палма де Мајорка, Мелбурн и Сихануквил, Камбоџа“.

Печалбарството е еден од најдлабоко врежаните корени во македонската култура и традиција. Уште од дамнешни времиња нашите Македонци оделе во туѓина да заработат за парче леб.

За маките во туѓина, за сопругите кои ги чекале дома, се пееле песни и се пишувале приказни и драми.

Парите се отепувачка, Печалбари, Бегалка, се едни од најтажните драми за тешката судбина на печалбарите. На сите страни од светот има Македонци, некои само на краткотрајна печалба, некои создале свои домови и семејства далеку од родната земја.

Времињата се менувале и сè уште се менуваат, но печалбарството останува дел од нашата македонска срж. Западноеверопските земји, Америка, Канада и Австралија се едни од најчестите дестинации за македонските „гастарбајтери“.

Но, со зголемување на популарноста на крстарењата многу млади Македонци се одлучуваат да запловат во морињата како модерни морнари, да уживаат во патувањата каде заработката е одлична.

©CRNOBELO.com Забрането преземање и копирање. Крадењето на авторски текстови  и фотографии е казниво со закон.

И. Ј.| Црнобело / фото: приватна архива