Филип Костовски, чевлар: „Чевлите нема да се прошират ако ги ставите во замрзнувач – ќе се оштетат“

Кое е најинтересното барање кое си го добил од клиент?

Најинтересна случка ми беше кога клиентка добила чевли од брендот Louis Vuitton на подарок од Дубаи, но ѝ дале различни броеви, лева 38-ца и десна 37-ца.

Но, бидејќи многу ѝ значел подарокот, се нафатив и ја преправив цела чевла за да бидат пар со број 37.

Колку години бил најстариот пар чевли што некогаш во животот си го поправил?

Најстариот пар ми беше задоволство да го работам – тоа беше пар чевли со старост од 43 години.

Стануваше збор за чевли кои ги носела бабичката на нејзината свадба и ги чувала, но бидејќи беа во фаза на распаѓање ѝ беше мерак да ги реставрирам и да ги вратам во живот, како што биле во фабричка состојба.

Ги средив комплет, клиентката беше презадоволна и рече дека ќе ѝ ги подари на внуката за да ги носи на нејзината свадба.

Дали има жени кои бараат да им ги промениш високите потпетици на чевлите, за да бидат повисоки/пониски, тешка ли е оваа процедура?

Па, не е тешко, но мора да се внимава за да не се создаде проблем. Ако е премногу скратена потпетицата може да се создаде проблем при одењето. Се креваат прстите напред, а оптоварувањето паѓа на мускулите на листот од ногата.

Значи ако дозволува моделот на чевли, може да се скрати потпетицата, но прво мора да се измери.

Имаат ли навика Македонците да ги четкаат со четка и боја чевлите? Порано многу почесто бевме сведоци на ваква практика, имаше дури и луѓе што го работеа ова во центарот на градот...

Па, искрено, сè е култура... Не значи дека ако сум чевлар може да ме омаложуваат и да ми носат чевли со кал, со влакна затоа што кучето лежело на нив или во патиките да има оставено чорапи итн.

Да, јас сум чевлар и си го сакам и работам мојот занает со задоволство, но кога ќе кажам дека чистењето плус се плаќа не им е сеедно и ми викаат тоа ми е работа. Но, не е така. Мене ми е поправката работа, а не да ги чистам чевлите пред да работам.

Не барам да бидат чевлите перени, нормално е да е газено по асфалт, но да има некоја граница.

Најголемите грешки во грижата за чевлите се...

Најголемите грешки се видео упатствата на Фејсбук и Јутјуб или советите од пријателите од типот „Ми рекоа да пробам со ова и со она“ и на крај завршуваат неуспешно и доаѓаа во „Doctor Shoes“, кај мене - докторот за чевли.

Прочитајте и како Филип се одлучил за овој занает - Чевларот Филип Костовски: „Не е точно дека чевли поправаат само луѓето кои немаат пари за нови“

© CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело