Фани Хаџиева: „На 9 години ми дијагностицираа дијабетес тип 1, примав инсулин по неколкупати на ден, а сега имам пумпа“

Детали

вторник, 04 октомври 2022

„Веќе 29 години живеам со дијабетес тип 1 и животот со дијабетес не е едноставен, тоа е состојба која те тера да созрееш порано, да знаеш да се грижиш за себе, секогаш да имаш со себе резерва инсулин, иглички, апаратче и лентички за мерење гликемија и се разбира нешто благо во случај на хипогликемија …“, споделува Фани Хаџиева (38) од Скопје за CRNOBELO.com, која вели дека поддршката од семејството е клучно, но и дека со дијабетес се живее долго и нормално.

Фани Хаџиева (38) од Скопје, дипломиран историчар архивист, веќе 29 години живее со дијабетес тип 1.

Таа вели дека ова не е болест, туку состојба со која се живее долго и нормално, доколку ја контролирате ситуацијата.

За својата животна битка, Фани открива за CRNOBELO.com:

Кога ја доби дијагнозата дијабетес мелитус тип 1 и што те натера да појдеш на лекар? Ако се потсетиш на детството, имаше ли некакви симптоми тогаш? 

Дијабетесот ми го открија ма 9 т.е. неполни 10 години. Моите родители забележаа дека повеќепати во текот на ноќта станувам за мокрење и пиење вода, драстично намалив тежина и немав концентрација. Тоа беше знак дека нешто се случува со мене.

Ме однесоа на клинка и ми проверија гликемија која во тој момент тогаш беше 32. Итно ме задржаа на детска клиника на одделот за ендокринологија.

Бев водена од доктор Зоран Гучев, кој веднаш ме стави на инсулинска терапија. И тогаш започна „борбата“.

Кои се други симптоми на оваа болест? Колку тие го отежнуваат животот? Каков третман примаш?

Од самиот почеток сум на инсулинска терапија.

На почетокот примав 2 пати на ден инсулин, потоа 4, па 5 пати.

После 17 години, се префрлив кај доктор Горан Петревски и благодарение на него добив инсулинска пумпа, да не речам вештачки панкреас, со што регулирањето на дијабетесот стана многу полесно.

Боцкањето не претставуваше тешкотија за мене, единствено беше тешко да се навикнам да не јадам благо. Во тоа време немаше апсолутно ништо за дијаберичари кај нас, за разлика од сега, кога има буквално сè. Роднините ми носеа производи од Австрија.

Што значи да се живее со дијабетес тип 1?

Животот со дијабетес не е едноставен, тоа е состојба која те тера да созрееш порано, да знаеш да се грижиш за себе, секогаш да имаш со себе резерва инсулин, иглички, апаратче и лентички за мерење гликемија и се разбира нешто благо во случај на хипогликемија.

Има ли многу пациенти со оваа дијагноза во Македонија?

Дијабетичари во Македонија има околу 400.000, од кои 26.000 на инсулинска терапија.

Влијаат ли некои надворешни фактори на состојбата?

Најважни фактори за регулирање на состојбата се исхраната и физичката активност, но освен тоа важен фактор е добриот сон и избегнувањето на стресот, настинките, вирусите, физичките повреди исто така влијаат.

Продолжува на следната страна...