Матеј од Скопје (12) e четирикратен европски шампион во карате: „Работам напорно за Македонија да се гордее со мене“

Детали

среда, 30 ноември 2022

„Со карате се занимавам од 5 години и тренирам веќе 7 години. Можам со гордост да се пофалам дека досега имам освоено вкупно 21 златни, 10 сребрени и 6 бронзени медали, а најголемо мое разочарување е кога на светското првенство оваа година, во системот на елеминации со недозволен удар бев повреден“ - вели во изјава за CRNOBELO.com Матеј Мангаровски (12), четирикратен европски шампион во карате.

Топлина на душата е кога гледаме млади луѓе кои се залагаат за боите на Македонија, што со гордост го веат македонското знаме и со многу ентузијазам говорат за подвизите што ги достигнуваат во спортот.

CRNOBELO.com имаше можност да поразговара со Матеј Мангаровски (12) од Скопје, кој веќе 8 години се занимава со карате и непрестано освојува медали на сите првенства каде што учествува.

За неговите почетоци, соништа и мечти, за CRNOBELO.com тој споделува....

Кој е Матеј приватно?

Јас сум Матеј Мангаровски, ученик во 7 одделение во ООУ „Јохан Хајнрих Песталоци“ од Скопје.

Се занимавам со карате (црн појас II DAN) и сум репрезентативец во МТКФ (Македонската Традиционална Карате Федерација), како член на карате клубот „Работнички“ од Скопје.

Како се роди љубовта кон каратето?

Како дете полно со енергија, ме запишаа на карате но потоа со тек на времето, каратето стана нераскинлив дел од мојот живот што најмногу ме исполнува.

Од која возраст се занимаваш со овој спорт и колку медали имаш освоено досега?

Со карате се занимавам од 5 години и тренирам веќе 7 години.

Можам со гордост да се пофалам дека досега имам освоено вкупно 21 златни, 10 сребрени и 6 бронзени медали на државни и меѓународни натпревари.

Кое ти е најдраго учество?

Имам учествувано на голем број државни и меѓународни натпревари, меѓутоа најдраго ми е учеството на „Европскиот шампионат во традиционално карате за јуниори и деца“ кое се одржа во 2019 година во Скопје, на кое успеав да станам четирикратен европски шампион во следниве категории:

• Kata Individual children (8-9 years old);
• Kihon Ipon individual children (8-9 years old);
• En-Bu- mix (8-9 years old);
• Kata Team children (8-9 years old).

На што си особено горд и кој е твојот идол?

Горд сум на бројните награди кои ги имам освоено.

Моите идоли се моите тренери Дејан, Аљоша и Венцислав Недеви кои се легенди во тредиционално карате и се неколкукратни европски и светски шампиони.  

Најголемо разочарување?

Најголемо мое разочарување е кога на Светското првенство оваа година, во системот на елеминации со недозволен удар бев повреден од страна на друг натпреварувач, а тоа не го санкционираа судиите и не успеав да се пласирам помеѓу првите 3 места.

Навистина ми тешко да го прифатам тоа, но со тек на време ме мотивираше да одам само напред.

Што те мотивира кога се натпреваруваш?

Моја мотивација е успехот и напредувањето во каратето.

Дали имаш посебен режим на исхрана?

Пред натпреварите, кога припремите се навистина напорни и исцрпувачки морам да внимавам на исхраната и да внесувам здрава храна полна со витамини, за да можам да ги издржам припремите и да бидам во одлична форма.

Вообичаено ја избегнувам храната која има многу шеќери.

Колку пати неделно имаш тренинзи?

Во вообичаени недели, имам 3 пати неделно тренинзи од по 1,5 часа, а кога се припремам за учество на натпревар тренирам секој ден во неделата.

Кој е твојот неостварен сон?

Би сакал да станам светски шампион во традиционално карате и напорно работам и се спремам за да го достигнам тоа.

Се надевам дека еден ден Македонија ќе може да се гордее со мене.

©CRNOBELO.com Забрането преземање и копирање. Крадењето на авторски текстови е казниво со закон.

М. У. Т. | Црнобело