Солено кафе за добредојде - стар турски обичај со кои девојките ја тестирале љубовта на младоженецот

Детали

недела, 14 мај 2023

На турски овој обичај се нарекува Tuzlu kahve, а служел како тест со кој можело да се процени каков сопруг ќе биде момчето што доаѓа да ја побара раката на девојката.

Во последните неколку години со доаѓањето на турските серии кај нас, се чини дека научивме многу за турските обичаи и култура, а честопати во нив може да се види како кога младоженецот оди да ја бара раката на саканата, таа ги пречекува со кафе.

Србинката Мима живее во Истанбул, а на својот Инстаграм профил @miminputokaz честопати споделува интересни фотографии од секојдневието во Турција, но и појаснува некои турски обичаи и изреки.

Во една од нејзините објави таа зборува за турскиот обичај познат како Tuzlu kahve или преведено како „солено кафе“.

Според обичајот, кога момчето ќе дојде во домот на девојката за да ја побара нејзината рака, таа треба да им свари кафе на стројниците и нему, но се случувало кафето што ќе му биде послужено на младоженецот да биде солено или луто.

Младоженецот во тој случај треба да се насмевнува и да се преправа дека сѐ е во ред, додека другите го гледаат како се препотува и го пие пијалакот и му се потсмеваат на маката.

Според легендите, оваа традиција доаѓа уште од времето кога браковите биле договарани, а на тој начин девојката можела да покаже како се чувствува за момчето што првпат го гледа во животот.

Ако на девојката и на нејзиното семејство им се допаѓа момчето, тоа ќе добие благо кафе со шеќер, но ако не им се допадне, тогаш сигурно ќе добие кафе зачинето со сол или со бибер.

На тој начин, девојката културно му порачувала на момчето дека откако ќе го испие кафето, не треба да се враќа во нејзиниот дом.

Според друга легенда, соленото или лутото кафе служеле како тест за тоа каков сопруг ќе биде младоженецот.

Доколку го испие пијалакот без да покаже каков било знак на непријатност, се сметало дека тој ја сака девојката и заради тоа ќе биде подготвен за неа да ги истрпи сите потешкотии што се симболизирани со соленото кафе.

Според легендите, обичајот своите почетоци ги има во приказната за Осман Февзи Бег, кој бил во служба на султанот Абдулхамид Втори.

Бегот бил многу вљубен во девојка по име Рефика.

Кога дошол во нејзиниот дом да ја побара за жена, таа се збунила, па наместо шеќер му ставила сол во кафето.

Осман Фавзи Бег, за да не ја посрамоти својата љубена, рекол дека многу сака да пие солено кафе, затоа што така навикнал да го пие во војската.

Рефика му поверувала и наредните 50 години постојано му варела солено кафе, а тој го пиел без да каже збор.

Наводно, признал дека тоа го правел од љубов кон својата сопруга дури во својот тестамент.

 Б. С. Б. | Црнобело