Мајка на ученик по масакрот во Србија: „Чуварот Драган го носеше мојот син во раце кога му беше скршена ногата“

Детали

петок, 12 мај 2023

„Чичко Драган Влаховиќ го носеше мојот син од кабинет во кабинет кога ја скрши ногата за да не губи од настава“, пишува мајка на ученик од училиштето „Владислав Рибникар“ за убиениот чувар кој немал деца, но учениците ги сакал како свои.

Српската актерка Милена Радуловиќ сподели вирална објава од мајка на еден ученик од училиштето „Владислав Рибникар“, каде во масакар седмoодделенец уби 8 ученици, како и еден возрасен.

Во оваа трагедија настрада чуварот на училиштето Драган Влаховиќ, за кој многу родители велат дека бил херој и спасител на нивните деца.

Така, една мајка стана вирален хит со фотографија на која Драган го носи во раце нејзиниот син.

Нејзината емотивна објава гласи:

„Чичко Драган Влаховиќ го носеше мојот син од кабинет во кабинет кога ја скрши ногата за да не губи од настава, во време кога после короната се врати во петто одделение“.

Српските медиуми пишуваат дека на погребот на Драган имало многу луѓе, меѓу кои и многу негови ученици, но и млади кои некогаш биле ученици во училиштето каде што работел.

Тој немал деца и сите нив ги гледал и третирал како свои деца.

Најпотресен момент на погребот бил кога на еден од цртежите оставени за збогум со човекот со големо срце, еден ученик го нацртал Драган како суперхерој.

 

 С. С. | Црнобело