Ноле со децата славеше титула во Торино и 400 недели прв на АТП: „Тие ми се среќната амајлија“

Детали

понеделник, 20 ноември 2023

„Пристигнаа моите деца. Тие ми даваат сила и ми ја зголемуваат самодовербата. Секој родител знае како се чувствувам. Пресреќен сум што се тука, тие се мојата среќна амајлија“, рече Новак Ѓоковиќ, откако го сруши рекордот на Роџер Федерер на завршните Мастерс турнири.

Најдобриот светски тенисер, Новак Ѓоковиќ синоќа (19.11) во Торино седми пат во кариерата го освои завршниот Мастерс турнир, по што се зацврсти на првото место на АТП листата.

Тој го урна и рекордот на Роџер Федерер, кој има 6 титули од завршните Мастерс турнири.

Новак во финалето беше подобар од Јаник Синер со 2:0 по сетови, а откако победи, прво се затрча кон трибините каде што го дочекаа синот Стефан и ќерката Тара, па со нив ја прослави титулата.

„Пристигнаа моите деца. Тие ми даваат сила и ми ја зголемуваат самодовербата. Секој родител знае како се чувствувам. Пресреќен сум што се тука, тие се мојата среќна амајлија“, рече Новак.

По официјалното доделување на пехарот, Новак заедно со децата позираше и во соблекувалната, а видеото стана хит на интернет.

Тројцата стојат покрај пехарот, дланките им се стегнати во тупаница и со рацете покажуваат „колку се силни“.

„Одиме“, пишува на видеото што го објави официјалната страница на АТП турнирите, а е всушност изразот што Ѓоковиќ го користи често пред и за време на своите натпревари.

Новак имаше уште една причина за славење – од денес (20.11), тој е официјално 400 недели на првото место на АТП листата.

Погледнете го видеото:

А. Ј. | Црнобело