„Во мојата зграда живее дете со аутизам и немам мир, каде да пријавам?“: Објава на Фејсбук предизвика лавина реакции во Србија

Детали

петок, 22 декември 2023

Во Фејсбук група за правна помош, корисник од Србија се пожалил дека во неговата зграда живее дете со аутизам кое правело врева. Тој прашува каде може да се пожали за ова. Во српска емисија, мајка на дете со аутизам зборува за ваквите злобни коментари и предрасудите со коишто се соочила.

За жал, факт е дека постојат многу предрасуди и стереотипи за лицата кои страдаат од аутизам.

Ова го потврдува и емисија на српската телевизија Prva televizija, каде што водителката разговара со мајка на дете со аутизам.

На почетокот, водителката споделува објава на Фејсбук кој предизвикала лавина реакции во Србија.

Објавата, односно прашањето било споделено на група за правна помош и гласи:

„Во зградата во којашто живеам, под мене има аутистични деца и буквално немам мир 24/7. Знаете ли можеби на кој начин може да се реши тоа?“

На прашањето дали самата се соочила со нешто вакво, гостинката во емисијата одговара:

„Интересно, но јас не. Затоа што веројатно сум имала среќа да живеам во мала зграда со четири стана, и некако тоа ви е веќе семејство. Тоа е поразлично, зарем не?

Но, низ годините јас сум голем активист во цела Србија и сум имала многу повици од родители – плачење, тужби, што ќе биде, како ќе биде… Кога мене ќе ми се јават тие родители, јас останувам без збор.

Јас не можам да верувам што воопшто се случува и зошто тоа се случува“.

Жената додава дека се прашува дали луѓето кои се закануваат со тужби и слично се свесни дека аутизмот е појава со која може да се соочи секој.

На прашањето како реагирала кога ја прочитала објавата на Фејсбук, жената одговара:

„Кога ќе прочитам коментар кој навистина е напишан со разбирање, тогаш гледам дека за нас има надеж. Дека за нас родителите и нашите деца има надеж. Дека подобро ќе нè разберат.

Но, кога ќе прочитам коментари кои се страшни, коментари кои велат 'Ослободи се од тоа дете, дај го во дом', многу се вознемирувам. Значи, мојот син повеќе не е таков, тоа е една фаза што поминала.

Но, многу се вознемирувам и емотивно се враќам во период кога ни јас сама не сум знаела што се случува со него“.

Инсертот од емисијата е објавен на Инстаграм, а во коментари бројни корисници го искажуваат својот револт кон оние кои не покажуваат разбирање за лицата со аутизам, но споделуваат и свои искуства:

„На кого му пречи дете, па тоа и дете со здравствен проблем, добро нека се запраша што не е во ред со него и од каде толку злоба и бесчувствителност“.

„Секој може да го снајде болест, затоа луѓето треба да имаат разбирање за другите“.

„На кого му пречи, нека си најде подобар стан. Јас самата сум мајка на дете со аутизам – кој нема разбирање, може малку да се едуцира бидејќи едно од десет деца има аутизам и може да му се случи на кого било. Треба да се зголеми свеста за аутизмот. Како општество се чини дека сме многу заостанати, но сега повеќе се зборува за ова, па можеби има надеж“.

„Како мајка на аутистично дете, можам само да кажам срамота за тој човек“.

„Нам двапати ни викнаа полиција бидејќи детето кое не зборува, правело многу врева…“

Погледнете го видеото:

Спирова С. | Црнобело