Марија Микиќ за мајчинството: „Се срамев од спонтаните абортуси, бев во депресија зашто не можев да дојам“

Детали

четврток, 14 март 2024

„Престани со депресијата, твоето дете ќе има сѐ, не си ни прва, ниту последна. Само среќната мајка е добра мајка“ – ова е советот што српската пејачка Марија Микиќ го добила од докторката откако паднала во депресија затоа што не може да го дои синот.

Двапати беше бремена во 1 година и сега има две деца, но српската пејачка Марија Микиќ вели дека нејзиниот пат до мајчинството воопшто не бил лесен.

Таа гостуваше во емисијата РТС ординација, каде отворено зборуваше на повеќе теми поврзани со нејзиниот пат до потомство.

Таа во гостување во емисија отворено призна дека пред да ги добие ќерката Ѓурѓа и синот Мили, имала 3 спонтани абортуси за кои не се знаела причината.

„Во еден миг другарката ме праша зошто не направам тест за тромбофилија. Поентата е тоа што кислородот не може да дојде до плодот и бременоста се завршува прерано. Кога дознав за клучот на проблемот, веднаш почнав со терапија и успеавме да ја добиеме Ѓурѓа“ – раскажува Марија.

Таа раскажува дека ѝ било потребно долго време отворено да зборува за спонтаните абортуси и дека се чувствувала засрамено.

„Ми беше срам, не знам зошто, но не сум виновна за тоа. Луѓето се отвораат за некој свој проблем само откако ќе се препознаат себеси во некого. Кога дознав за тромбофилијата, една другарка ми рече: ‘колку си ти себична, толку девојки те следат, а ти не сакаш да зборуваш за тоа’,

Ми беше чудно да зборувам за својата интима, но таа беше во право, ги решивме проблемите на голем број луѓе“ – открива во својата изјава.

Инаку, само 40 дена по раѓањето на ќерката Ѓурѓа, Марија пак остана бремена со синот Мили.

Таа вели дека терапиите во двете бремености биле различни. За време на првата бременост ѝ давале инјекции, додека за време на втората примала само суплементи.

Марија се осврна и на големиот број негативни и навредливи коментари кои следуваа откако се дозна дека по само 40 дена од раѓањето успеала да забремени вторпат.

„Кога излегуваа тие коментари, само ме интересираше колку треба да бидеш несреќен за некому да му го напишеш тоа, посебно на жена што е бремена.

Тие не знаат колкупати јас сум седела и сум плачела, па воопшто не ме навредуваше тоа што некој нема попаметна работа од тоа да седи и да пишува негативни коментари“ – рече таа.

За крај Марија појасни дека проблемите со лактацијата кај неа предизвикале мала депресија и дека се чувствувала ужасно.

„Не можев да му го дадам на детето тоа што е најздраво за него. Потоа докторката ми рече: ‘Престани со депресијата, твоето дете ќе има сѐ, не си ни прва, ниту последна. Само среќната мајка е добра мајка’“ – раскажа Марија.

Б. С. Б. | Црнобело