Солун добива метро: По 20 години чекање, локалците и туристите ќе се спасат од сообраќајниот хаос

Детали

вторник, 26 ноември 2024

Цената на метро билет во Солун ќе биде 0,60 евра за 1 час возење, а од еден до друг крај на градот ќе се стигнува за 17 минути. По 20 години чекање Солун добива метро.

По две децении работа, во сабота (30.11) Солун конечно ќе добие метро.

Веќе е најавено свеченото отворање, на кое треба да присуствуваат голем број политичари и јавни личности, а црвената лента ќе ја пресече премиерот на државата Кирјакос Мицотакис.

Се очекува дека со воведувањето на метрото во Солун ќе се реши огромниот проблем со метежот, а значително ќе се забрза патувањето од еден до друг дел во градот.

Ќе бидат отворени вкупно 13 станици, а цената на билетот ќе чини 0, 60 центи за еден час, додека дневниот билет ќе чини 2,5 евра.

Во периодите на најголемиот сообраќаен метеж возовите ќе тргнуваат на секои 3,5 минути.

Како што е најавено, во метрото ќе биде дозволено влегување со велосипед (со тоа што е дозволено носење на најмногу 2 велосипеди во секој воз) и со миленици, кои треба да се сместени во соодветни транспортери.

Се проценува дека патувањето од еден до друг крај на градот ќе трае околу 17 минути, што во изминатите години беше невозможна мисија низ сообраќајниот метеж.

Инаку, изградбата на метрото во Солун започнала во 2003-та година, но за време на ископувањата биле најдени голем број историски артефакти, како пат од римското доба, грчки гробници и мозаици.

Со пронаоѓањето на секој локалитет, изградбата на метрото дополнително беше одложувана, а досега се најдени вкупно 300.000 артeфакти.

Голем број од овие артефакти се изложени на станиците на метрото, но постапките за нивно ископување и заштита се покажале како мошне скапи, заради што изградбата на метрото чинела околу 3 милијарди евра.

Б. С. Б. | Црнобело