Жената од Хрватска што си ја уби ќерката (3) изведена на суд: Детали за случајот што го потресе регионот

Детали

четврток, 02 октомври 2025

Во јануари годинава, хрватската полиција добила повик од жена која им кажала дека влегла во реката Сава со нејзината 3-годишна ќерка. Девојчето, за жал, е мртво, а беше пронајдено неколку месеци подоцна, во Сава во околината на Белград. Неодамна, почна судењето за потресниот случај.

Неделава во Загреб почна судењето на 34-годишната жена која е обвинета дека ја убила својата 3-годишна ќерка.

Како што пренесуваат регионалните медиуми, жената го усмртила девојчето во јануари годинава, а телото го фрлила во реката Сава.

Девојчето било најдено неколку месеци подоцна, во околината на Белград, а набрзо потоа мајката била обвинета за тешко убиство.

Според неофицијални извори, девојчето имало сериозни здравствени проблеми, а мајката тврдела дека надлежните институции не ѝ излегле во пресрет.

Што знаеме за потресниот случај?

На 16-ти јануари годинава, полицијата во Загреб добила телефонски повик од жена која кажала дека влегла во реката Сава со нејзината 3-годишна ќерка.

По вознемирувачкиот повик, веднаш се активирале сите дежурни служби и почнале интензивна потрага по телото на девојчето.

Како што пренесува Jutanji list, потрагата траела до доцна навечер, но поради намалената видливост и брзината на реката, не вродила со резултати.

Следниот ден, во изјава за хрватските медиуми, пожарникар откри дека во потрагата се вклучени околу 50 луѓе.

Покрај противпожарната служба, имало претставници од Црвен крст и полицијата, а реката се пребарувала со седум чамци и четири дронови.

Потоа бил формиран уште еден тим од 33 луѓе кои пребарувале друга област долж реката, исто така со чамци и дронови.

Потрагата почнала во областа каде што влегла мајката, но набрзо се проширила по целиот тек на реката Сава во Загреб.

33-годишната мајка, чие име не е познато за јавноста, била уапсена ден-два подоцна.

За Jutarnji list, неколку колеги на жената откриле дека биле изненадени од целата ситуација бидејќи не изгледала како да има проблеми.

Но, нејзини познанички откриле дека тешко се справувала со „животните предизвици“.

„Мајката не се јавуваше на телефон цел ден. Полудевме од грижа. Ја немавме видено ни ќерка ѝ, па претпоставуваме дека е со неа.

Потоа стигнаа вестите за потрагата во Сава, а потоа дојде и полицијата да ни каже што се случува. Катастрофа и ужас!

Кога жената забележа дека нејзината ќерка има некои здравствени проблеми, ја однесе на логопед и тоа трае веќе со месеци. Не знаеше како да се справи со целата семејна ситуација и сето тоа ја мачеше“, вели познаничката.

Таа додава дека можеби девојчето имало некаква сериозна дијагноза, но ништо од ова не е официјално потврдено.

Друга познаничка изјавила дека жената изминативе шест месеци била на боледување.

„Само ми велеше дека сè ќе биде во ред. А, всушност, по сето ова, тоа било само маска.

Била растргната од неизвесната иднина, но за жал тоа е дел од една тажна семејна приказна за која не сакам да зборувам“.

Потрагата по телото на девојчето продолжи со месеци, и надвор од границите на Хрватска.

Дури на 30-ти април, надлежните соопштија дека го нашле.

Во реката Сава во близина на Белград било пронајдено мртво тело на дете, а со помош на ДНК анализа било потврдено дека станува збор за убиеното девојче.

Набрзо потоа хрватското обвинителство започнало обвинение за тешко убиство против жената, а надлежните потврдија дека претходно немало никакви пријави во врска со нејзиното семејство. Судењето започна на 29-ти септември.

Покрај мртвото девојче, жената имала и уште едно дете. Но, идентитетот на детето и нејзиниот сопруг не ѝ се познати на јавноста, со цел да се заштитат.

Уште кога жената беше уапсена, надлежните открија дека психолошката анализа ќе биде клучна. Но, поради деликатноста на случајот, ги немаат откриено резултатите.

Исто така, судењето нема да биде отворено за јавност, најмногу за заштита на семејството.

Спирова С. | Црнобело

фото: Фејсбук