Го пронајдовме сопственикот на Бетмен куќата во Радовиш, што е вирален хит – која е приказната зад дизајнот?

Детали

четврток, 27 април 2023

Кој живее во куќата на Бетмен во Радовиш? Стапивме во контакт со сопственикот кој за CRNOBELO.com споделува повеќе фотографии и открива од каде била инспирацијата за да изгради ваква куќа.

На социјалните мрежи деновиве кружат фотографии од куќа во Радовиш, со мотиви од Бетмен, и додека многумина шпекулираат за тоа кој е сопственикот на куќата и дали се работи за голем обожавател на стрип-јунакот, CRNOBELO.com стапи во контакт со него.

Тој ни откри повеќе детали за неа и сподели неколку фотографии со кои имавме можност да видиме како изгледа дворот и надворешното уредување околу неа.

Во куќата од Радовиш што масовно се споделува на социјалните мрежи не живее Бетмен, туку Баже Костадинов со неговото четиричлено семејство.

Баже е бизнисмен од Радовиш, кој од 1996-та година отворил своја такси компанија со името „Бетмен“, а денес има своја превозна фирма со истото име.

Во изјава за CRNOBELO.com вели дека идејата за дизајнот на куќата е инспирирана од нивниот бренд:

„Тоа е наш заштитен бренд и ние го почитуваме. Идејата за дизајнот на куќата е инспирирана од него. Замислата за изгледот на куќата беше моја и на семејството и заедно со архитекти успеавме да ја реализираме“ – вели тој.

Станува збор за нова куќа, која била изградена пред 6 месеци. Баже вели дека засега внатрешноста сѐ уште не е завршена, но планираат и таму да има детали и мотиви инспирирани од познатиот стрип-јунак.

Погледнете повеќе фотографии во продолжение:

Б. С. Б. | Црнобело / фото: приватна архива