Секоја чест! Македонски генијалци освоија 4 медали на математичка Олимпијада во Јапонија
- Детали
- среда, 12 јули 2023
„Успехот на овие наши деца е успех за целата татковина“ - велат од Сојузот на математичари на Македонија. Тие ги пофалија 6-те средношколци кои постигнаа огромен успех на Математичката олимпијада во Јапонија, а на кои е горда цела Македонија. Браво за сите, а особено за Дамјан Давков и златниот медал!
Шест македонски средношколци постигнаа огромен успех на 64. Интернационална математичка олимпијада. Тие освоија четири медали и две пофалници на престижното натпреварување што се одржа во Чиба, Јапонија.
Успехот на македонските математички генијалци го пофалија и од Сојузот на математичари на Македонија, па им посакаа уште поголеми постигнувања во иднина.
„Ни претставува особена чест да објавиме дека на 64. Интернационална математичка олимпијада (ИМО 2023) – најпрестижниот математички натпревар за ученици од средните училишта, која годинава се одржува од 2.07-13.07.2023 година во Чиба, Јапонија – македонската репрезентација постигна одличен успех.
На овој светски мегдан за извонредност нашата екипа се закити со еден златен, еден сребрен, два бронзени медали и две пофалници.
Дамјан Давков (златен медал; со освоени 32 поени)
Алексиј Тасиќ (сребрен медал; со освоени 25 поени)
Никола Цветаноски (бронзен медал; со освоени 23 поени)
Никола Спировски (бронзен медал; со освоени 19 поени)
Јан Стојановски (пофалница; со освоени 17 поени)
Бранко Јангеловски (пофалница; со освоени 11 поени)
Успехот на овие наши деца е успех за целата татковина! Им честитаме и им посакуваме уште многу идни академски достигнувања“.
А. Ј. | Црнобело
Би можело да ве интересира:
