Македонка, омажена во Волос, за CRNOBELO: „Состојбата со поплавите во Грција е ужасна, кај мене пред куќа тече река по улицата“

Детали

среда, 06 септември 2023

„Овде е хаос, исплашени сме, не престанува да врне. Автомобилите веќе до половина ни се во вода. Забрането е движење, освен ако некаде не мораш да одиш итно. Мојот сопруг вчера отиде на работа, но ги пуштија дома затоа што снемале струја на работното место…“, раскажува Јадранка Лефкелис Ташкова oд Валандово за CRNOBELO.com, која веќе 15 години живее во Волос, Грција.

Јадранка Лефкелис Ташкова oд Валандово веќе 15 години живее во градот Волос во Грција.

Таа е омажена за Грк, а сега за CRNOBELO.com споделува каква е состојбата со поплавите во овој град, кој е еден од најпогодените региони.

Волос се наоѓа во централниот дел на Грција, покрај најважниот национален пат Атина - Солун (од кој е одвоен 10km). Од градот Атина е оддалечен 326km и 215km од Солун.

Над градот се издигаат планините Пилио и Мавровуни. Климата во Волос е средоземна, со карактеристични жешки лета и благи зими со редок снег.

Оттаму се фаќа траект за грчкиот остров Скијатос.

Јадранка за CRNOBELO.com раскажува каква е состојбата со поплавите во Волос:

„Овде е хаос, не престанува да врне. Дури и самиот градоначалник во видео обраќања ги молеше луѓето да одат дома за да се заштитат.

фото: magnesianews.gr

Автомобилите веќе до половина ни се во вода. Дождов е навистина интензивен и ми се чини дека вчера (05.09) за еден ден наврна дожд како за 2 години што врне во нормални услови.

фото: magnesianews.gr

Има и починато лице и лица кои се водат како исчезнати.

На прогнозата за Волос дава дожд и во текот на следните денови. Забрането е движење освен ако некаде не мораш да одиш итно.

фото: magnesianews.gr

Мојот сопруг вчера отиде на работа, но ги пуштија дома затоа што снемале струја на работното место. Во околината на градот уште нема струја.

Во некои делови од градот нема вода. Еве и кај нас на периоди снемува вода, а потоа тече со кал.

фото: magnesianews.gr

Мислам дека вчера за еден час наутро удриле 12.000 громови, ужасно беше.

фото: magnesianews.gr

Има и поплавен мост, а пред нашата куќа по улицата како да се слева река.

Снимив и видео од кај мене дома за да ви ја доловам ситуацијата:

Не знам како ќе биде деновиве, но исплашени сме каква ќе биде состојбата поради најавата за непрекинати дождови“.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело

фото: magnesianews.gr; depositphotos.com