Маја Кикириткова за предвремено родените син и ќерка: „Со двете деца ми се одлепи плацентата, иако имав уредна бременост“

Детали

понеделник, 06 ноември 2023

„Многу е битно да знаете дека предвремено родените деца заостануваат во растот и развојот за онолку недели колку што се родиле порано“, напиша Маја Кикириткова, и се сети на голготата низ којашто поминала со синот и ќерката.

Модната дизајнерка Маја Кикириткова, чиј син Лазар (5) и ќерка Ева (3) се родени предвреме, со искрена и емотивна објава на Инстаграм, 10-тина дена однапред го одбележа Светскиот ден на предвремено родените деца - 17 ноември.

Таа ја раскажа приказната за раѓањето на синот и ќерката, кога во двата случаја ѝ се одлепила плацентата, па, Кикириткова морала предвреме да ги донесе на свет бебињата.

Во својата искрена исповед Кикириткова вели:

„Што всушност се случи и зошто двете мои деца се предвремено родени? Имав уредна бременост, редовни контроли, одев на јога за трудници, посетував часови за идни мајки и сè во врска со бременоста, породувањето, бебето.

И во двата случаја имав абрупција (одлепување) на плацентата, во истата гестациска недела, бебиња со иста килажа.

Лазар беше во инкубатор, си отидов дома, а тој остана да лежи во болница.

Ева остана само на опсервација – 8 дена бевме заедно во болница и потоа отидовме заедно дома.

Да не беа тие часови што ги посетував додека бев бремена, и менторката Даница која многу ми помогна и беше во постојана комуникација додека Лазар беше во болница, јас не знам дали моите деца ќе беа на ексклузивно доење, дали правилно ќе се развиваа.

Многу е битно да знаете дека предвремено родените деца до 2 години треба да имаат коригирана возраст и дека заостануваат во растот и развојот онолку недели колку што порано се родиле.

17 ноември е Светски ден на предвремено родените деца и секогаш ќе биде посебен за мене“.

 А. Ј. | Црнобело