Модната дизајнерка Ивана Кнез го прослави роденденот: „Успех ми е што престанав да пијам кафе и алкохол“

Детали

среда, 03 април 2024

„Престанав да пијам алкохол и кафе, не јадам бел шеќер и бело брашно. Ми остана да научам дисциплина, да создадам навика за вежбање, да не го држам тоа што не сака да биде покрај мене“ – дизајнерката Ивана Кнез го одбележа 39-тиот роденден со торта на која пишува „Стара за Леонардо ди Каприо“.

Нашата позната модна дизајнерка Ивана Кнез вчера (02.04) го прослави својот 39-ти роденден. Со торта без шеќер и глутен и забавен натпис, таа го одбележа важниот ден, а на Инстаграм сподели повеќе објави.

На Инстаграм Стори Ивана ги напиша малите успеси што ги постигнала во текот на изминатата година, како и тоа што допрва треба да го научи.

Таа се фотографираше со лалиња и до фотографијата упати емотивна порака до своите следбеници и обожаватели.

„До 39 научив дека тоа што вреди не се купува со пари, дека ништо на светот не може да замени прегратка под ѕвездено небо, дека љубов постои само ако ѝ дозволиш да дојде, дека животов не брои години туку мигови заробени во сеќавања, мигови кои го прават вреден да се живее секој ден како да е последен.

Најголемото клише е најголема вистина, среќата е во малите работи кои почнав себично да ги споделувам со шака луѓе за кои ја давам душата.

Здравјето е единствена желба која ја имам овој пат.

Колку побрзо се вратиме назад и сфатиме дека од лајкови не се живее, туку од прегратки, од бакнежи, сочувство, мириси, вкусови и бои толку побрзо ќе останеме помлади.

Му благодарам на универзумот што ми подари совршен живот досега, со огромни тумби румби кои ме направија ова што сум. Дишам љубов заедно со сите вас, ве љубам со цело мое срце“ – порача Ивана.

Инаку, во духот на нејзиниот нов и здрав начин на живот, Ивана сподели фотографија од роденденската торта со која го одбележала важниот ден.

Станува збор за торта без шеќер и брашно, на која стои натписот „Премногу стара за Леонардо ди Каприо“ (Too old for Leo Di Caprio).

Инаку, Ивана денес треба да има своја модна ревија во рамки на Skopje Fashion Festival, а во последната објава рече дека чувствува трема пред големиот настан.

Б. С. Б. | Црнобело