Уште една добра вест: Парите за Матео (2) од Скопје се собрани за 24 часа – кај детето има напредок во состојбата

Детали

петок, 07 јуни 2024

Првично бараните 1 милион денари за лекувањето на малиот Матео од Скопје се собрани за 1 ден – д-р Лазаров соопшти дека има мал напредок кај детето, но битката продолжува. Уште еден доказ дека овој народ е хуман.

Деновиве на социјалните мрежи се споделуваше апел за собирање средства за лекување на Матео од Скопје.

Станува збор за 2-годишно дете, кое по краток престој во приватна болница во Скопје, итно е пренесено и хоспитализирано во болница во Србија, под дијагноза Syndroma haemolyticouaremica D 59.

Ова е болест која доведува до брзо откажување на функцијата на бубрезите, хемолитичка анемија и намалување на бројот на тромбоцитите.

На платформата за собирање средства ЕCrowd, беше поставена кампања со цел да се соберат 1 милион денари, односно околу 15.000 евра кои им биле побарани на семејството за лекување.

Д-р Ненад Лазаров, кој е дел од тимот на платформата, сподели дека бараните средства се собрани за 1 ден, но бидејќи во најновиот документ со детална пресметка од болницата се бараат 18.000 евра, кампањата е уште отворена.

„Луѓе мои, ги собравме засега потребните средства за Матео во износ 1.000.000 денари за 24 часа, големо срце има овој народ.

Сите кои дониравте, споделивте, нè поддржавте, треба да сте горди, ова е уште еден позитивен случај!

Истовремено сакам да знаете дека кај детето има напредок, чекор по чекор но има напредок“ – напиша тој во Фејсбук објава.

На Матео му посакуваме успешна борба од која ќе излезе како победник, а се надеваме дека нашиот народ ќе остане секогаш сплотен во моменти кога треба да се направи добро дело и да се спаси живот. 

М. М. | Црнобело