Христина Пан емотивна една година по лекувањето на ќерката (2) во Словенија: „Требаше да тргнам сама со дете, бев преплашена“

Детали

петок, 08 ноември 2024

„Пред да тргнеме бев преплашена од резултатите што ќе ги добиеме, од прв лет сама со дете и тоа лет што не те носи на некоја супер дестинација за одмор, туку баш напротив. Петар беше службено отсутен во Америка, Хана ја оставам со бабите, дедото. А јас како сама?“ - напиша Христина Пан, една година откако со ќеркичката Тара беше на лекување во Словенија.

Македонската инфлуенсерка Христина Младенов, која на Инстаграм е позната како Христина Пан, повеќе од една година, заедно со сопругот Петар, се борат со болеста која ѝ беше дијагностицирана на нивната ќеркичка Тара пред нејзиниот прв роденден - Neuroblastoma Metastaticum.

Христина, која е мајка на близначките Хана и Тара, неодамна откри дека чекаат и трета ќерка, па помеѓу големите грижи и стравови низ кои семејството минуваше долго време, конечно имаат повеќе причини за среќа.

За болеста на Тара (2) дознаа кратко пред првиот роденден на близначките.

По ова Тара беше хоспитализирана во Скопје, а потоа имаше и третмани во Љубљана и во Истанбул.

Нејзиното лекување е при крај и ќе продолжи в година, кога Тара во Турција ќе ја прими последната терапија.

Сега, една година откако Тара беше на терапија во Љубљана, Христина на својот Инстаграм сподели емотивно видео во кое го покажа патот кој го поминале таа и ќерката.

Таа ѝ се заблагодари и на својата пријателка, инфлуенсерката Сандра Кирков, која ѝ била столб на кој се потпирала во моментите кога ѝ било најтешко, и кога со Тара морале сами да заминат во Словенија, на патување полно со неизвесност и страв.

Во видеото, Христина сподели снимки од првиот лет на Тара, првата ноќ во хотелската соба во Љубљана каде што девојчето спиело „како плескавица меѓу мама и тете“, од моментите кога Сандра ја разгалувала Тара со подароци, како и од излегувањето од болницата.

Видеото завршува со забавната игра во центарот на Љубљана, каде Христина и Сандра ја држат малата Тара за рачињата и ја креваат за да „скокне“ неколку метри нанапред, а Христина вели:

„Кога сè ќе заврши, ќе имаме многу поголем скок од овој“.

Во емотивната објава, полна со надеж и позитивни мисли, Христина напиша:

„Една година од Љубљана, од оваа гледна точка сега цела таа секирација, после сѐ поминато ми е смешка жива.

А, тогаш... пред да тргнеме, преплашена од резултатите што ќе ги добиеме, од прв лет сама со дете и тоа лет што не те носи на некоја супер дестинација за одмор, туку баш напротив.

Петар во тој момент службено отсутен во Америка, Хана да ја оставам со бабите, дедото... А јас како сама?

И додека се мислев, па ајде може ако не ќе одам со татко ми, колку да имам друштво вака, така...

И оваа Сандра Кирков, не знам дали ја знаете, истиот ден кога ѝ поплакав, најде карти, обезбеди превоз до Ниш и од таму лет за Љубљана, дојде со нас и на крај ни го направи ова патување баш како да одиме на одмор и шетање (само без плажа).

Малку се ваквите пријатели на број, чувајте ги ако ги имате.

П.С. Извинете, сестра ми беше таму, за да сме во роднинска врска и да ни доаѓа на гости во болница“.

Погледнете го видеото:

А. Ј. | Црнобело