61-годишна пациентка го роди своето прво бебе, Петар, на ГАК во Скопје: „Не постојат повеќе граници во медицината“

Детали

вторник, 26 ноември 2024

„Оваа мајка-херој како што ја нарекуваме е прва која е останата бремена со сопствена јајце-клетка, која што било претходно замрзната, добила ин-витро третман во нашата држава, цела бременост била следена во нашата држава и раѓањето е извршено на Универзитетската клиника за гинекологија и акушерство“ - изјави директорката на ГАК, Ирена Алексиовска Папестиев. 

Уште една позитивна вест од светот на медицината во Македонија - 61-годишна пациентка за првпат стана мајка, а се породила на Универзитетската клиника за гинекологија и акушерство. 

Таа е највозрасната пациентка која се породила во земјава, а на свет донесе момче, кое го крстила Петар. 

Директорката на Клиниката за гинекологија и акушерство, Ирена Алексиовска Папестиев, даде изјава за медиумите по повод породувањето на највозрасната пациентка во Македонија.

„Почитувани, дека во светот на медицината не постојат повеќе граници и дека медицината во Македонија може да се мери со онаа во светски граници, говори раѓањето на бебето Петар, коешто на свет го донесе највозрасната пациентка во нашата држава.

Оваа пациентка е прва која е останата бремена со сопствена јајце-клетка, којашто била претходно замрзната, којашто добила ин-витро третман во нашата држава, цела бременост била следена во нашата држава и раѓањето е извршено на Универзитетската клиника за гинекологија и акушерство.

фото: Фејсбук

Кај пациентката направивме царски рез во 36 гестациска недела и истата роди плод, Петар, кој беше тежок 2.350 грама и 48cm долг.

Оперативниот тек помина уредно, со оглед на тоа што оваа мајка херој, како што ја нарековме, имала богато гинеколошко и акушерско минато.

Пациентката имала 3 претходни интервенции, од кои 2 во Белград, една на нашата институција и понатаму, во тек на бременост којашто била контролирана, имала висок притисок и шеќерна болест“ - гласи дел од изјавата на директорката Алексиовска Папестиев“. 

М. М.| Црнобело / фото: depositphotos.com