Бебе родено во Скопје со 1.100g и срцева мана, по 50 дена си оди дома со 2.100g - Го оперирал д-р Чадиковски

Детали

среда, 21 јануари 2026

„По 50 дена континуирана борба, денес ова бебе се испишува во одлична општа состојба, со телесна тежина од 2.100 грама. Ваквите приказни нè потсетуваат зошто медицината не е само професија, туку и мисија“, вели детскиот кардиохирург, д-р Владимир Чадиковски.

Детскиот кардиохирург, д-р Владимир Чадиковски, кој години наназад е вистински херој за многу родители, оперирајќи срца на преку 1.500 бебиња и мали деца и грижејќи се за секое од нив, преку објава на Инстаграм покажа колку се гордее со својата работа и сподели приказна со среќен крај за уште едно новороденче кое било во критична состојба.

Неговата објава гласи: 

„Бебето е родено во 29. гестациска недела, со родилна тежина од 1.100 грама во многу тешка здравствена состојба.

Поради дијагностицирана срцева мана итно беше префрлено на нашиот оддел за понатамошно лекување.

По 50 дена посветен третман, грижа и континуирана борба, денес ова бебе се испишува во одлична општа состојба, со телесна тежина од 2.100 грама, заедно со своето семејство.

Огромна радост за семејството, но и за нас. Браво за родителите за нивната сила и трпение.

Големо браво за целиот медицински тим од одделот за детска кардиохирургија – за знаењето, посветеноста и човечноста.

Ваквите приказни нè потсетуваат зошто медицината не е само професија, туку и мисија“.

С. С. | Црнобело