Игор Џамбазов за татко му: „Три години без тебе, маестро мој, на истиов ден е роден нашиот ангел Тоше - каква симболика“

Детали

сабота, 25 јануари 2025

Актерот и шоумен Игор Џамбазов со емотивна порака ја одбележа тригодишнината од смртта на својот татко, маестро Александар Џамбазов.

За потсетување, Александар Џамбазов почина на 25 јануари 2022 година на 86 години.

Тој беше диригент и композитор, но и еден од великаните на македонската современа музика, иницијатор за создавање на детскиот фестивал „Златно славејче“, автор на многу детски песни, но и филмска музика.

Објавата на Игор за неговиот татко гласи:

„Три години без тебе, маестро мој.

Ти направија преубав мурал во Дебар маало, именуваа улица по тебе, има предлог една позната концертна сала да го носи твоето име.
Не те заборавија луѓето, да знаеш.

На истиов овој ден е роден нашиот ангел Тоше.
Каква симболика!!!

Се родил најубавиот глас, а си заминал еден голем маестро. Животиште.

И токму денес, шест планети од сончевиот систем се израмнуваат на небото.
Редок момент за ретки луѓе.

Лесно ви небо и на двајцата!“

С. С. | Црнобело