„Песнава ме прогонува со денови“ - Џамбазов ја пее „Ако утре ме нема“ во чест на Андреј и жртвите од пожарот

Детали

понеделник, 24 март 2025

„Песнава со денови наназад ми дише во врат. Како доказ за бесмисленоста на животот. Како опомена за идните генерации“ - вели Игор Џамбазов, кој со многу тага ја пее „Ако утре ме нема“ од ДНК.

Изминатата недела беше тешка за сите, со многу солзи, споделување убави и тажни спомени за жртвите од пожарот во дискотеката во Кочани, и најтажниот ден - погребот на 59-те загинати.

Со болката секој се справи различно - едни со молк, други со објава на фотографии од блиските и по некоја раскажана анегдота за нив или за времето поминато заедно.

Тоа го направи и Игор Џамбазов, кој на својот Инстаграм објави фотки со Андреј од ДНК, со Сара Пројковска и се прости од сите жртви во пожарот.

Една недела по несреќата, Игор вели дека и понатаму не може да го прифати фактот дека некои негови пријатели и соработници ги нема, па објави видео во кое ја пее „Ако утре ме нема“.

„Песнава ме прогонува. Со денови наназад ми дише во врат.

Како потстанар да ми е во мозокот. Како краста што не зараснува.

Како доказ за бесмисленоста на животот. Како опомена за идните генерации.

Почивајте во мир деца наши...“, напиша тој во пораката.

Кликнете на видеото:

А. Ј. | Црнобело