Брајан Адамс доби рачно насликана јакна од нашиот дизајнер Сатја Грабулоски: „Ја правевме 180 часа“

Детали

вторник, 29 април 2025

„Реакцијата на Брајан беше искрена, со огромна насмевка и едно долго WOOOOW. Очекуваме да ја носи на некој следен настап“ - вели за CRNOBELO.com, Сатја Грабулоски, кој со неговиот тим изработи јакна со ликот на популарниот пејач и му ја подарија викендов на неговиот концерт во Скопје.

Македонскиот дизајнер Сатја Грабулоски, кој во светот е познат по уникатните и оригинални патики кои со својот тим ги изработува за некои од најпознатите спортисти и музичари, овој пат направи нешто сосема поинакво.

Сатја и SWithaDot изработија јакна за канадскиот музичар Брајан Адамс.

На јакната, која е направена од вегански материјали, целиот тим работел околу 180 часа. Освен ликот на славниот пејач, испишан е и насловот на неговиот најнов сингл.

Јакната на Адамс му ја предаде Бобан Милошоски од „Авалон продукција“, откако тој го заврши својот концерт во Скопје.

За CRNOBELO.com, Сатја откри детали за реакцијата на Брајан Адамс, но и за инспирацијата и процесот на креирање на уникатната јакна:

„Јакната е рачно составена од потврдени вегански материјали, бидејќи Адамс е познат по тоа што е веган.

Целиот процес на составување, а потоа и на сликање, зеде приближно 180 часа рачна работа на нашиот тим артисти.

Темата на дизајнот е неговиот последен сингл Roll Up the Punches, а идејата да изработиме јакна за Адамс потекна од мојата мајка, која ја обожава неговата музика.

Инаку, ние веќе 6 години за секој истакнат уметник кој ќе ја посети Македонија подготвуваме Welcome to Macedonia рачно сликан подарок.

Идејата е да му покажеме дека земјата во која доаѓа го цени, но и да го рашириме талентот на македонските уметници низ светот.

Таков беше и случајот со Брајан, чија реакција беше искрена, со огромна насмевка и едно долго WOOOOW. Очекуваме да ја носи на некој од неговите следни настапи“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело