Јасна од Скопје со позитива на денот: „На најомразениот семафор што душа ми вади, добив порака што ме трогна“

Детали

понеделник, 15 септември 2025

„Тргам од парк кон Водно, со планиран стрес поради лошо регулираните семафори, но на најомразениот, онојшто порано го преминував секој ден и душа ми вадеше, видов пешачки претворен во сцена, и девојка која ми подари и едно ливче со порака, ме трогна...“, вели Јасна Шоптрајанова и нè потсетува и на убавата страна на животот во Скопје

фото (десно): Боро Арсовски

Скопје живее тешки денови, но не смееме да заборавиме дека среде сивилото кое го искусуваме има и светли точки, а токму таква ситуација сподели и скопјанката Јасна Шоптрајанова на својот Фејсбук профил.

Јасна, по професија преведувачка, ја познаваме и како активна граѓанка и културна работничка.

Taa секоја година е дел од настани за подигнување на јавната свест на многу теми, како што е настанот за подигање на свеста за аутизам (фотографија горе десно), покренат и воден од Денис Јанкуловски – Космонаутко. Во рамки на тој настан, Јасна секоја година го води музичкото катче, каде посетителите и волонтерите пеат и танцуваат.

Јасна откри дека минатата седмица на најомразениот семафор во Скопје ја дочекало позитива на денот и порака која долго ќе ја памети.

Нејзината објава гласи:

„Познато е колку ги рантам семафорите, и апсолутно со право, стварно не разбирам ни која е идејата, ни кој е алгоритамот според кој ги програмирале. За пешаците е најлошо, но и за автомобилите е неоптимално.

Тргам утрово од парк кон Водно, со планиран стрес, ноооооооооо....

На најомрзнатиот семафор што порано го преминував секој ден и душа ми вадеше, го гледам ова.

Пешачкиот претворен во сцена.

Се вика Нериња, уметница и патувачка од Аргентина. Тука е во моментов, да ни подари утрински бои и радост.

Ми подари и едно ливче со порака, ме трогна, ја примив и го предадов ливчето натаму.

Ако некој ја знае или ја сретне денес, молам да ми јави контакт, сакам и јас да ѝ подарам нешто“.

С. С. | Црнобело