„Детето ангел“ - Емотивни објави на родителите на Фросина Кулакова за нејзиниот роденден, денес ќе наполнеше 23 години

Детали

среда, 25 јуни 2025

Трогателни зборови полни болка испратија Камелија и Тодор Кулакови на роденденот на нивниот ангел... „Фросина беше мојата ќерка. Но, таа беше и многу повеќе. Таа беше уметност во движење, срце што шиеше соништа, стил што не се учи“, вели нејзината мајка.

И дизајнерот Никола Ефтимов на својот Фејсбук профил се огласи по повод 25 јуни, денот кога неговата студентка Фросина Кулакова требаше да наполни 23 години.

Неговата објава:

„25 јуни беше роденденот на драгата Фросина Кулакова. 

Овој ден нè потсетува на нејзината исклучителна енергија, ведрина и добрина, но и на болката од нејзиното прерано и трагично заминување.

Преку љубовта и посветеноста на нејзиното семејство, се роди иницијатива што ќе го продолжи нејзиниот дух - фондација што ќе поддржува добри дела и ќе обезбедува образование за млади таленти во модниот дизајн.

Следете ги нивните објави во наредните денови за повеќе информации.

Нека е вечен споменот на Фросина“.

Оваа вест ја потврди и мајката на Фросина, Камелија, која на својот Фејсбук профил напиша:

„Пред вас денес не стои само еден проект. Стои болка што се претвори во одлука. Стои гласот на една девојка која повеќе не може да зборува, па зборуваме ние. Стои љубов, преточена во визија што не бара сожалување – туку шанса да менува животи.

Фросина беше мојата ќерка. Но таа беше и многу повеќе. Таа беше уметност во движење, срце што шиеше соништа, стил што не се учи – се носи. Нејзиниот живот не згасна од болест, туку од неодговорност. Нејзината смрт не беше природна – беше системска.

И додека правдата сè уште чека, јас не чекам повеќе. Фондацијата што ја основавме не е обичен хуман гест – таа е отпор. Таа е крик, но тивок, достоинствен, структуриран. Таа е нашето "доволно е".

Ние нема да градиме само споменик од камен. Ќе градиме од живот:

Секоја стипендија ќе биде шанса за нова Фросина.

Секоја поддржана мајка – едно срце што нема да полуди од тишината.

Секој млад човек што ќе научи за безбедност – еден спасен живот.

Ве повикувам – не од жал, туку од правда – да ја поддржите оваа фондација.

Не заради минатото. Туку заради иднината што сакаме да ја смениме.

Нека од Фросина не остане само болка. Туку пример. Светлина. Движење.

Ова е нашиот подарок за неа“.

Објавата од Никола Ефтимов ја сподели и таткото на Фросина, Тодор:

„Роденденска честитка за детето АНГЕЛ - Фросинче колку и да боли - од нејзе омилениот професор и наш врвен дизајнер Никола Ефтимов, кој и беше еден од најдрагите ментори и идоли и испрати честитка, каде и да е сега нашата мила Фросинче...

Ако може професоре во нејзино име да се заблагодариме...

А сигурен сум дека и таа од „горе' ви благодари за честитките и сè друго што ја научивте и и ѝ даривте...“

С. С. | Црнобело