Авантуристичко запросување на Леонора од кочанско – над море, на парасејлинг во Марбеља (фото+видео)

Детали

понеделник, 06 октомври 2025

„По цел ден прошетка низ градот, Бојан предложи да се качиме на парасејлинг. Јас со насмевка го одбивав, велејќи дека тоа веќе сме го доживеале во Тунис, но неговата упорност беше посилна од моите убедувања, па се согласив. И токму таму, над брановите, во тој миг на безвремена убавина, Бојан го извади прстенот“ - раскажува за CRNOBELO.com Леонора. 

Леонора Митрева (25) е дипломиран инженер геолог, а својата професионална приказна продолжувам да ја градaм во лабораторија за култура на ткиво.

Нејзиниот, сега веќе вереник, Бојан Крстов (27) е дипломиран економист во областа на сметководство и ревизија, но по душа и професија – професионален тапанџија во изворниот оркестар „Мелем“.

Минатиот месец тој ја запроси својата сакана, на авантуристички начин, за време на парасејлинг на патувањето во Марбеља, Шпанија.

За запросувањето, Леонора раскажува подетално за CRNOBELO.com:

„Нашата приказна започна уште во 2012 година, кога за првпат се сретнавме и запознавме во Фолклорниот ансамбл „Љупчо Сантов“ во Оризари.

Заедно учевме песни и ора, чекоревме во ритамот на истата музика, а пријателството што таму се роди, неколку години подоцна, во 2017-та, прерасна во љубов.

И еве, на 13 септември 2025, таа љубов доби ново поглавје со запросувањето.

Запросувањето беше како сцена од сон. Се случи во Марбеља, Шпанија, град кој како да е создаден за романтични авантури.

Уште од првиот ден бевме маѓепсани од медитеранската убавина, златните плажи, палмите и улиците полни со живот.

По цел ден прошетка низ градот, Бојан предложи да се качиме на парасејлинг.

Јас со насмевка го одбивав, велејќи дека тоа веќе сме го доживеале во Тунис, но неговата упорност беше посилна од моите убедувања.

Додека мене ме подготвуваа со опремата, тој веќе го имаше договорот со екипажот на бротчето, а во тишина ја криел најубавата тајна – прстенот.

Се сеќавам како пред да тргнеме, сите ги оставивме нашите работи во мали орманчиња. Јас воопшто не ни насетив дека токму тогаш Бојан го скрил прстенот толку блиску до мене, со страв дека ништо нема да го издаде.

Сè уште се смеам кога ќе се сетам – јас го убедував да не се качуваме, а тој, со насмевка, ме охрабруваше да погледнеме кон Марбеља од високо.

Кога се издигнавме над брановите, пред нас се отвори поглед од кој застанува здив – блескавата Марбеља под нас и морето кое светеше во сите нијанси на сино.

И токму таму, во тој миг на безвремена убавина, Бојан го извади прстенот.

Не очекував ништо и можеби токму затоа моментот беше совршен. Организацијата му беше беспрекорна, а неговата нежност и внимание направија запросувањето да биде најромантичниот миг во мојот живот.

Подоцна ми призна дека единствената негова грижа во текот на целото патување била прстенот – дали ќе го пронајдат на аеродромските контроли и ќе го расипат изненадувањето, или пак, дали ќе успее да го скрие до вистинскиот момент.

Пред Марбеља, патувавме и низ Севиља, каде што прстенот веќе беше со него, но тој чекал вистинско авантуристичко место кое ќе го одрази нашето патување низ животот.

Потоа ја посетивме и Малага, каде што Мирадор де Гибралфаро ни подари магичен поглед кон градот и морето, создавајќи спомени кои ќе останат вечни.

Убавината на Фуенгирола и сончевите плажи на Шпанија, со својот топол песок и блескав хоризонт, беа како рамка на ова наше поглавје кое заврши со – „ДА“.

Тоа „ДА“ беше мојот најискрен одговор. Јас бев пресреќна, а срцето ми беше полно со љубов и благодарност за човекот кој секогаш знае како да ми подари моменти што се паметат цел живот.

Придружници на најубавиот наш ден и најубав одмор беа нашите најдобри другари, Маја и Филип“.

Погледнете видео од запросувањето:

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело