Запросување на Канео: Дечко клекна пред девојка од САД, која пред 5 години била волонтер во Македонија (фото)

Детали

петок, 11 јули 2025

Лорен од САД е поранешна волонтерка, која ја посети Македонија пет години по завршувањето на својата служба, но тука сега доживеа еден од најубавите мигови во животот и засекогаш ќе ја помни нашата држава по убаво. Таа беше запросена на местото кое има една од најубавите глетки кон Охридското Езеро.

Кога странци ќе одлучат дека Македонија е совршено место за запросување, тогаш не можеме да добиеме подобар комплимент, зарем не?

Лорен од САД, некогашен волонтер на Peace Corps во Македонија, засекогаш ќе ја помни нашата држава по овој прекрасен миг.

Peace Corps (Мировен корпус) е американска независна агенција која испраќа квалификувани волонтери во различни држави за проекти во образование, здравство, економски развој и други области.

Програмата во Македонија започнала во 1996 година, а до денес стотици волонтери успешно ја завршиле својата служба.

Но, Македонија на некои од нив им оставила толку силен впечаток, како на Лорен, што оваа некогашна волонтерка одлучила да се врати тука на прошетка по 5 години.

Но, за време на нејзиниот престој тука со партнерот Хемптон и една нејзина пријателка, исто така поранешна волонтерка, таа била изненадена од него со запросување на Канео.

Објавата на Фејсбук од оваа организација гласи:

„Знаете што е подобро од тоа поранешни волонтери на Мировен корпус повторно да ја посетат Македонија?

Да се свршат тука, на Канео!!! Урааа!

Токму тоа ѝ се случи на нашата поранешна волонтерка Лорен, која нè посети пет години по завршувањето на својата служба.

Лорен, нејзиниот партнер Хемптон и нивната пријателка Кејти (која исто така беше волонтерка пред 5 години) патуваа низ земјата, уживаа во вкусна храна, во прекрасни предели и ги посетија пријателите и семејствата-домаќини на Лорен и Кејти во Лозово, Штип и Мустафино, кои со огромна радост ја примија прекрасната вест.

Погледнете ги овие неверојатни фотографии... Честитки за Лорен и Хемптон! Ви посакуваме живот полн со љубов и среќа!“

С. С. | Црнобело

фото: Лорен за Peace Corps North Macedonia