„Аеродром за Панчо“ - МЗТ и навивачите кренаа транспарент во негова чест, во салата молк и емоции

Детали

среда, 05 ноември 2025

Пред натпреварот, на трибините кои се вообичаено гласни - молк! Облечени во дресови од клубот, навивачите на МЗТ кренаа транспарент посветен на музичарот: „До последна стотинка, плаво-бел во крв и ДНК. Почивај во мир Панчо“.

Владимир Блажев - Панчо беше страстен навивач на МЗТ, кошаркарскиот клуб од неговата населба Аеродром и низ годините често одеше на нивните натпревари.

Дури и кога не можеше да ги следи во живо од трибините, знаеше да им испрати порака во знак на поддршка, а и во интервјуа да каже дека МЗТ му е во срцето.

Две недели по неговата смрт (14 октомври), кошаркарите и навивачите на клубот, решија да се простат достојно од него, за последен пат.

Преку Фејсбук страницата „Фамилија Аеродром“, која ги поврзува сите навивачи на клубот, тие најавија дека пред натпреварот МЗТ Скопје - Куманово, сите заедно ќе се простат од Панчо.

„Аеродром за Панчо. Натпревар во кој ќе оддадеме почит на Панчо, аеродромец кој вистински го сакаше МЗТ. Апелираме да се носат црни обележја“ - пишува во нивната објава.

А пред натпреварот, на трибините кои се вообичаено гласни - молк!

Облечени во дресови од клубот, навивачите на МЗТ кренаа транспарент посветен на музичарот.

„До последна стотинка, плаво-бел во крв и ДНК. Почивај во мир Панчо“ - пишува во пораката.

На теренот, пак, кошаркарите стоеја покрај голема фотографија од Панчо, висока околу два метра.

Таа фотографија, потоа ја качија на трибините во чест на својот страстен навивач.

Ова е втор поздрав од навивачите на МЗТ до Панчо, кои веднаш по веста за неговата смрт, на натпревар дојдоа со траспарент: „Почивај во мир“.

Прочитајте и Татко кој се гордееше со синовите, хуманитарец кој двоеше од себе за оние што немаат - Сеќавање на Панчо од ДНК

А. Ј. | Црнобело