Татко кој се гордееше со синовите, хуманитарец кој двоеше од себе за оние што немаат - Сеќавање на Панчо од ДНК

Детали

среда, 15 октомври 2025

За јавноста беше Панчо, но за синовите - тато. За оние кои доаѓаа на неговите диџеј сетови беше DJ Shorty, но за пријателите - џуџе. А сите го знаеја како голем борец, хуманитарец кој двоеше од себе за да им помогне на оние кои имаа помалку од него. Владимир Блажев, кој почина на 14.10.2025, засекогаш ќе остане синоним за човечност и добрина.

Владимир Блажев - Панчо од дуото ДНК, почина на 46 години, седум месеци по страшниот пожар во Кочани, во кој се здоби со изгореници по лицето и телото, а во кој почина и неговиот музички брат Андреја Ѓорѓиески.

Седум месеци Панчо се бореше храбро. Седум месеци семејството, пријателите, луѓето кои соработуваа со него, но и оние кои никогаш не го сретнале, се надеваа дека ќе ја добие големата битка и ќе излезе од болница, ќе почне „втор живот“.

Сега е на небото, заедно со мајка му која ја обожаваше и чија смрт никогаш не ја прежали, но и со Андреја, Сара и останатите членови на бендот кои ги загубија животите во пожарот во Кочани на 16 март 2025-та.

Кога ќе се спомене името на Панчо, една од првите асоцијации е „човекот со големо хумано срце“. А веднаш до неа се и „пожртвуван татко на Андреја и Марјан“, „огромен фудбалски фан“ и „вљубеник во патики“.

Ова, сепак е само дел од она што беше Панчо.

Роден е на 29 јули 1979 година во Скопје.

Малкумина знаат дека негов полубрат (по татко) е Зоран Блажевски, култен градски лик познат како Зоки малиот од Џубокс, а за кого велат дека ги поставил темелите на урбаниот ноќен живот во градот.

Панчо отсекогаш ја сакал музиката.

Кариерата ја почна во „ОК бенд“, а „Непристоен предлог“ беше еден од нивните најголеми хитови.

Но, во тоа време се запозна со Андреј, кој тогаш членуваше во „ТНТ“.

Во 2001-ва година ја снимија првата заедничка песна, „Девојка за везден“ и со тоа почна приказната која траеше повеќе од две децении.

Песната ја направи Александар Ристовски - Принц, кој им предложил да се викаат „ДНК“.

Вториот сингл „Благодарам однапред“ стана вистински евергрин во македонската музичка ризница.

Продолжува на следната страница...