Почина мајката на Дарко Илиевски, 3 месеци по смртта на татко му: „Кажете им на родителите дека ги сакате додека имате можност за тоа“

Детали

среда, 03 декември 2025

„Денес си замина и мајка ми… Болката е преголема, тишината боли! Ми замина најголемата љубов. Мамо те сакам најмногу! Чувајте се со тато“ - Дарко Илиевски се прости од мајка си, која почина само неколку месеци по смртта на татко му.

Пејачот Дарко Илиевски, кој се прослави со настапот на „Идол“, вчера ја загуби својата сакана мајка, само три и пол месеци откако почина татко му.

Дарко сподели црнобела фотографија на Инстаграм и порака полна со емоции за да се прости од неа.

„Драги пријатели. Со голема болка ве известувам дека денес си замина и мајка ми… Болката е преголема, тишината боли! Ми замина најголемата љубов. Мамо те сакам најмногу! Чувајте се со тато.

Доколку сè уште ги имате своите родители, застанете една минута, јавете им се и кажете им дека ги сакате… Еден ден ќе немате можност да го направите тоа!!!!“, напиша Дарко.

Болката на пејачот, кој веќе неколку години живее во САД, е уште поголема, бидејќи на средината на август годинава почина неговиот татко.

Тоа се случи набрзо откако Дарко дојде во Македонија, а потоа во интервју кажа дека татко му како да чекал да го види последен пат пред да почине.

„Почивај во мир, татко мој. Ти беше мојот најголем пример за сила, чесност и борба.

Секогаш ќе ја паметам твојата добрина и твојата жртва за нас. Засекогаш ќе ми недостасуваш“, напиша тогаш Дарко.

А. Ј. | Црнобело