Ленче Делова, која почина на 77 години, остави неизбришлива трага на филмската сцена - Од „Светот на бајките“ до „Пред дождот“

Детали

понеделник, 16 февруари 2026

Ленче Делова е актерката на нашата младост, жена која со својата ведрина, препознатлив лик, глас и филмски улоги остави неизбришлива трага на македонската филмска сцена.

Вчера (15.02) на 77 години почина актерката Ленче Делова, една од омилените на македонската публика. Таа беше театарска, филмска и телевизиска глумица, а нењјзиното име повеќе од половина век беше нераскинливо поврзано со сцената на Драмски театар - Скопје.

Оттаму и ја соопштија веста за нејзиното заминување во вечноста.

„Со длабока тага и неверување ја примивме веста дека почина нашата драга колешка и актерка, Ленче Делова.

Нејзиниот талент, топлина и насмевка ќе останат засекогаш во нашите срца и спомени. Театарот загуби уметник, а ние - пријател и прекрасен човек.

Почивај во мир. Искрено сочувство до семејството и најблиските“, напишаа од театарот.

Ленче Делова е родена на 15 јуни 1948 година во Скопје, а актерскиот пат го започнала уште во 1964 година како аматер на сцената на тогашниот Драмски младинско-детски театар.

Имала само 16 години кога за првпат стапнала на сцената, а таа подоцна ќе стане нејзин втор дом.

Во 1970 година се вработила во Драмски театар и таму остана сè до пензионирањето во 2013 година, оставајќи зад себе богата и значајна актерска трага.

 

Со специфичен и автентичен сценски сензибилитет, Делова беше добитник на многу актерски награди. Офелија во „Хамлет“ ѝ ја донесе Наградата „13 Октомври“ во 1978 година, а за улогата на Трајанка во „Ни ќар - ни зијан“ ја доби наградата за најдобро глумечко остварување на МТФ „Војдан Чернодрински“ во Прилеп во 1996 година.

Во 2006 година ѝ беше доделена и наградата за животно дело „Војдан Чернодрински“, како признание за нејзиниот исклучителен придонес во македонскиот театар.

Но, генерациите кои растеа со неа ќе ја паметат и по улогите во бројни телевизиски филмови и серии, меѓу кои „Итар Пејо“, „Илинден“, „Чук Чук Стојанче“, „Македонски народни приказни“, „Светот има осум страни“, како и во филмовите „Диво месо“, „Тетовирање“, „Пред дождот“, „До балчак“ и многу други.

„Легендите живеат вечно“, напишаа нејзините пријатели на Фејсбук, простувајќи се од актерката.

А. Ј. | Црнобело