„Куќата без тебе не е куќа, тишината без твојата смеа е потешка од секој крик“ - Таткото на Надица која загина во Кочани

Детали

понеделник, 16 март 2026

„Една година срцето на татко ти плаче за тебе, за твојата насмевка, за твоите чекори што никогаш повеќе нема да се слушнат“, напиша Алејсандар Наунов, таткото на Надица, во пораката која го кине срецето.

Александар Наунов, таткото на Надица, една од жртвите во пожарот во дискотеката „Пулс“, често јавно споделува колку му недостига неговата прерано почината ќерка.

На годишнината од пожарот, во кој таа го загуби животот на само 17 години, Александар објави видео на Фејсбук, посветено на Надица.

Со емотивни зборови, кои го кинат срцето, Александар ѝ се обраќа на својата ќерка, па напиша:

„Ќерко моја, ѕвездо моја која сјае на небото…

Денес помина точно една година откако те нема, а болката е иста како првиот ден.

Времето не ја лекува раната кога родител го изгубил своето дете. Таа рана само учи како да живее со солзите.

Ќерко моја, куќата без тебе не е куќа. Тишината без твојата смеа е потешка од секој крик.

Секое утро се будам со надеж дека ќе те видам, дека ќе го слушнам твојот глас… но наместо тоа, ја гушкам празнината што остана зад тебе.

Една година те барам во соништата, во ѕвездите, во секој ветер што ќе помине.

Една година срцето на татко ти плаче за тебе, за твојата насмевка, за твоите чекори што никогаш повеќе нема да се слушнат.

Но знај едно, ќерко моја… Ти не си само спомен. Ти си моето срце. Ти си мојата душа.

И додека јас дишам - ќе живее и твоето име.

Почивај мирно, ѕвездо на татко ти. Ќе те сакам до последниот мој здив“.

Надица е првото дете на Александар и неговата сопруга Габриела, кои ја имаат и помалата ќерка Анѓела.

Претходно во интервју за CRNOBELO.com, Александар раскажа како ѝ кажале на помалата ќерка дека Надица веќе ја нема и никогаш нема да се врати, но и како учат да живеат со болката по огромната загуба.

Прочитајте и Таткото на Надица, која загина во Кочани, за CRNOBELO.com: „Најтешко беше да ѝ кажеме на помалата ќерка дека сестра ѝ веќе ја нема“

А. Ј. | Црнобело