Moќна објава на наш наставник: „Престанете да бидете слуги на своите деца, направете ги способни за живот“

Детали

четврток, 09 април 2026

„Со тоа што правите сè наместо вашите деца, не им помагате - ги хендикепирате. Најголемиот чин на љубов е да го подготвите детето да може без вас“, е дел од моќната вирална објава на наставникот Драганчо Таневски.

Драганчо Таневски од Велес дипломираше на Факултетот за ликовни уметности во Скопје на додипломските студии по графика, а од 2018 година работи како наставник по ликовно образование во ООУ „Тодор Јанев“ во Чашка и ООУ „Петар Поп Арсов“ во Богомила.

Драганчо од своето искуство со децата сега сподели свои впечатоци и откри која е најголемата грешка што ја прават родителите.

Неговата вирална поучна објава:

„Престанете да бидете слуги на своите деца, направете ги способни за живот.

Не ви го кажувам ова само како наставник кој секојдневно гледа деца кои не знаат да ги отворат ранците без потсетник од родител, туку како човек кој израснал во семејство каде независноста беше врвен приоритет.

Благодарен сум што ме научија сам да си готвам, да чистам и да ги носам своите одговорности, бидејќи тоа ме направи силна личност која знае како да преживее.

​Мојата порака до вас е едноставна, пресечете ја папочната врвца.

Гледам деца кои се целосно изгубени - ако родителот не ги потсети за домашна задача или не им ги заврши основните обврски.

Со тоа што правите сè наместо нив, вие не им помагате, вие ги хендикепирате.

Не дозволувајте да станете робови на сопственото дете.

Дајте им обврски, на пример готвење, чистење, грижа за домот - тоа не се „машки“ или „женски“ работи, тоа се вештини за опстанок.

Тргнете се настрана и дозволете им да згрешат и да почувствуваат одговорност. Искуството е она што го гради карактерот.

​Вашата задача не е да им го олесните патот со тоа што ќе го чистите пред нив, туку да ги подготвите нив да чекорат цврсто по секаков терен.

Научете ги да бидат независни денес, за да бидат функционални луѓе утре. Најголемиот чин на љубов е да го подготвите детето да може без вас“.

С. С. | Црнобело