Вирална објава на Македонка: „Скопје мириса на смрт. Тука децата не растат со румени образи, туку со инхалации“

Детали

понеделник, 22 декември 2025

„Тука, во Скопје, децата не растат со румени образи, туку со инхалации, сирупи и антибиотици. Со бронхити што се повторуваат, со кашлици што стануваат нормала и со прозорци што не се отвораат.. дури ни преку ден“, вели Ина Михајлова, уметница и мајка од Скопје, за загадениот воздух со кој мака мачиме.

Ина Михајлова, уметница и мајка од Скопје, на својот Фејсбук профил искрено ја прокоментира ужасната ситуација со загадениот воздух во Скопје и испрати апел да престанеме да молчиме.

„Дишеме отров“, порача таа.

Нејзинатa објава, која вирално се споделува:

„Мириса на смрт.

Тука децата не растат со румени образи, туку со инхалации, сирупи и антибиотици. Со бронхити што се повторуваат, со кашлици што стануваат нормала и со прозорци што не се отвораат.. дури ни преку ден.

Секој ден сме со грижа на совест што сакаме да се прошетаме надвор.

Како здрави бели дробови да се луксуз.

И додека се гушиме, ни продаваат приоритети што немаат врска со реалноста.

Приоритет е детето да може да истрча без да се закашла.

Да заспие без инхалатор покрај кревет.

Да не знае што е антибиотик пред да знае да чита.

Ова не е драма.

Ова е секојдневие.

И колку повеќе молчиме, толку подлабоко дишеме ОТРОВ!“

С. С. | Црнобело / фото: depositphotos.com