Иван Јованов: „Оперирав грло во февруари и паднав психички - полека се враќам во посакуваната вокална форма“

Детали

сабота, 02 мај 2026

„Не е лесно, целосно ми е изгубена вокалната кондиција, зашто јас си вежбав цел живот. Психички бев многу паднат овој пат поради фамилијата, детето и други планови, размислував што би било кога би било. Ама, полека се враќам и тоа ми е најбитно“, вели Иван за CRNOBELO.com, за втората операција на грлото.

Пејачот Иван Јованов, фронтменот на „Либеро бенд“, во средината на февруари направи операција на грлото.

Операцијата на неколку недели го оддалечи од настапите, но и од неговата редовна рутина, а му смени и неколку големи планови во животот.

И покрај тоа, Иван денес се чувствува добро, полека се враќа на својата рутина и животот од пред операцијата, а почна и со свирките во живо.

Ова е негова втора операција на грлото, откако претходно го оперирал од бениген тумор.

Иако вели дека не сака да зборува многу за ова, за CRNOBELO.com ни раскажа како се чувствува во моментов, но и за самата операција:

„Се оперирав на 18 февруари на Клиника, кај д-р Илија Камишковски и презадоволен сум по операцијата. Бојата на гласот ми е сочувана.

Ги слушав сите негови совети и бев послушен во периодот на рехабилитација.

Од пред три недели почнав и со настапите во живо, а од неодамна почнав да вежбам и пробувам да се вратам во нормала и вокално и психички и физички.

Не е лесно, целосно ми е изгубена вокалната кондиција, зашто јас си вежбав цел живот.

Психички бев многу паднат овој пат поради фамилијата, детето и други планови, размислував што би било кога би било. Ама, полека се враќам и тоа ми е најбитно“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело