Маја Андоновска во истата облека од пред 32 години, настапи на јубилејот на СИ-ДО: „Точна ми е, само ракавите се скратиле“

Детали

петок, 08 мај 2026

„Ќе настапам и со оригиналните СИ-ДО алишта, поконкретно кошулата и елекот кои ги чував 32 години и сè уште ми се точни, иако сега долгиот ракав станал 3/4“, откри актерката пред да се појави на сцената во Битола.

Актерката Маја Андоновска Илијевски, во 1994 година пееше на детскиот фестивал СИ-ДО и тогаш настапи со песничката „Досадна недела“.

На настапот носеше панталони ѕвонарки, бела кошула со карнери на ракавите и црвен елек, а на косата имаше црна панделка.

Маја, повторно ја испеа оваа песничка вчера (07.05) во Домот на културата во Битола, на одбележувањето на јубилејот „30 години СИ-ДО“.

А таму, настапија и дел од тогашните деца ѕвезди, кои се денес возрасни жени и мажи.

Пред својот настап, преку Инстаграм Стори, Маја откри дека повеќе од 30 години ја чува облеката што ја носела на својот настап, а потоа во неа се појави и на концертот.

„Ќе настапам и со оригиналните Си-До алишта, поконкретно кошулата и елекот кои ги чував 32 години и сè уште ми се точни, иако сега долгиот ракав станал 3/4“, напиша Маја.

Таа објави уште една фотка, направена зад сцената на фестивалот во далечната 1994-та, со порака до себе:

„Ова девојче на фотографијата имаше многу соништа. Мирна сум, знам дека не ја разочарав“.

На јубилејот на фестивалот, некогашните деца ѕвезди пееја во придружба на оркестарот DIVA, а публиката можеше да ги слушне „Како ли јас да пораснам“, „Визба стара и гитара“, „Софи, Софија“ и други.

Погледнете го настапот на Маја од 1994 година:

А. Ј. | Црнобело