Македонка работи во хотел во Малта: „Гости од Германија правеле нудли во бокал во соба, Французинка побара нож да сече лубеница“

Детали

вторник, 16 јуни 2026

Изгледа не се само Балканците со необични хотелски манири, Бојана од Македонија споделува ситуации од работата во хотел во Малта: „Гостите – германски пар – секој ден по неколку пати вареле нудли за да заштедат на храна. Искрено, не очекував некој да помине 10 дена во хотел и речиси целосно да се храни со нудли. Интересно е што хотелот е целосно распродаден, а само четири гости имаат доплатено појадок“.

Бојана Стојчевска е Македонка, која неколку години живее во Малта, а моментално работи во одделот за човечки ресурси во хотел со 4 ѕвезди.

На својот LinkedIn профил, таа често споделува ситуации од секојдневието и животот во Малта, најчесто такви кои ја шокираат, но и ја тераат да се замисли за одредени бизнис и менаџмент теми од реалноста.

Во една од објавите, таа зборува за тоа со каков тип на гости од светот се има соочено, но и за тоа колку е променет туризмот и колку луѓето целат кон тоа да патуваат повеќе, а да трошат помалку.

Во продолжение нејзината објава во целост:

Малта: Нудли туристи и лути сопственици на бизниси

Изминатава година работам како HR во хотел со 4 ѕвезди. Сѐ беше вообичаено и немав многу допирни точки со гостите, сѐ до моментот кога почнавме да го подготвуваме отворањето на нашиот втор хотел.

Патем, отворањето е утре – голем успех за компанијата и резултат на многу месеци работа.

Мојот дел од проектот – регрутација, селекција и формирање на нов тим – е речиси завршен.

Додека колегите од другите оддели интензивно ги обучуваат новите вработени во новиот објект, мене ми припадна дополнителна улога, покрај моите редовни обврски, ја презедов и рецепцијата.

Тоа значеше едно нешто: директен контакт со гостите.

И навистина, за кратко време видов ситуации кои не би ги очекувала ни на сон.

Првиот шок го доживеав кога девојките од housekeeping ме повикаа во една соба затоа што електричен бокал за малку не предизвикал пожар.

На крајот се покажа дека гостите – германски пар – секој ден по неколку пати вареле нудли за да заштедат на храна. Искрено, не очекував некој да помине 10 дена во хотел и речиси целосно да се храни со нудли.

Само два дена подоцна, лут сопственикот на ресторанот дојде да пријави дека група британски гости „позајмила“ прибор за јадење без да праша. Подоцна приборот беше пронајден во нивната соба, заедно со неколку чинии од ресторанот.

А, врвот го доживеав денес.

Гостинка од Франција дојде на рецепција и љубезно побара нож за да исече лубеница. Купила цела лубеница од маркет затоа што исечените парчиња биле поскапи.

Од друга страна, сопственикот на ресторанот е незадоволен затоа што гостите не ги користат неговите услуги, па наплаќа по 1 евро за користење прибор. Гостите, пак, наоѓаат свои начини да ги намалат трошоците.

Интересно е што хотелот е целосно распродаден, а само четири гости имаат доплатено појадок.

Ова ме натера да размислам.

Проблемот не е во нудлите, лубеницата или приборот за јадење. Проблемот е што туризмот се менува.

Хотелите се полни, но потрошувачката по гостин сѐ повеќе се намалува. Луѓето патуваат повеќе од кога било, но истовремено бараат начини да потрошат што е можно помалку.

За туристите тоа е паметно управување со буџетот.

За хотелите, рестораните и локалните бизниси тоа е нова реалност на која ќе мора да се прилагодат.

Прашањето повеќе не е колку гости ќе дојдат.

Прашањето е: како ќе создадеме вредност за гостите така што тие ќе сакаат да потрошат повеќе, а не само да преспијат кај нас.

M. M. | Црнобело

Фото: CRNOBELO.com - генерирано со AI / depositphotos.com