Излезе „е-Бонтон“ прирачникот за убаво онлајн однесување

Детали

петок, 28 јуни 2013

Излезе од печат првиот македонски „е-Бонтонˮ прирачник со 100 правила за добро однесување на интернет, проект кој се реализираше од страна на Фондацијата „е-Македонија“ на Македонски Телеком.

На 27, 28 и 29 јуни (четврток, петок и сабота) пред книжарниците ТРИ,  Табернакул, Матица и Култура, промотивно ќе биде поделена првата количина од прирачникот на случајните минувачи, со што и граѓаните ќе имаат можност да го видат  првиот македонски прирачник за електронска комуникација, во кој сите правилата се предлози на граѓани кои сакале да одговорат на повикот на Фондацијата и да се вклучат во проектот.
По истекот на овој промотивен период, граѓаните бесплатно ќе можат да го добијат „е-Бонтон“ прирачникот за електронска комуникација во сите Телеком продавници во Македонија, кој е во ограничен број. Но, за сите оние кои нема да успеат да дојдат до печатената верзија на овој прирачник, тој ќе биде достапен и во електронска верзија на сајтот на е-Бонтон: www.ebonton.mk, како и на на интернет страницата на Фондација „е-Македонија“, www.e-makedonija.org.mk, на веб страницата на Македонски Телеком и на  порталот Идивиди,.

Фондацијата „е-Македонија“ минатата година во декември започна со реализација на проектот „е-Бонтон”, со цел создавање на правила за убаво однесување во електронската комуникација и подигнување на јавната свест за начинот на кој луѓето комуницираат преку социјалните мрежи. Фондацијата креираше своја веб страница www.ebonton.mk  и Фејсбук фан страница „е-Бонтон“ која беше отворена за сите оние што сакаа да споделат свое правило за да се креира прирачникот. Од многуте предлози, се избраа 100-те најуспешни објавени во него. Проектот беше поддржан и од невладината организација Метаморфозис, Младинскиот отворен форум и Високата школа за новинарство и односи со јавност.  

„Драго ни е што проектот „е-Бонтон“ наиде на одличен прием кај нашите сограѓани, особено кај оние кои секојдневно се вклучени во интернет комуникацијата. Им се заблагодарувам на сите кои учествуваа, испратија свое правило и на тој начин истакнаа што според нив е добро, а што треба да се промени во нашето однесување во виртуелниот простор. Благодарение на нивните лични искуства, совети и предлози Фондацијата го креираше првиот прирачник од ваков вид во Македонија со цел да се подобри електронското општење и  да послужи како корисна збирка на правила за етичко однесување и комуницирање на интернет. На овој начин, се надеваме, ќе придонесеме до значајно подобрување на комуникацијата и меѓусебното разбирање во онлајн заедницата”. – изјави Радмила Јончевска, директор на Фондацијата „е-Македонија“.