Макпрогрес и Црвен Крст заокружија успешна партнерска година во реализација на низа хуманитарни активности

Детали

петок, 29 декември 2017

По шест месечните активности, заврши успешно реализацијата на проектите каде Макпрогрес и Црвен Крст вклучија околу 50 деца со посебни потреби од повеќе градови во земјата. Целта на овој проект беше да им се овозможи на овие деца инклузија во заедницата и нивна социјализација, вклучително и и нивен развој и благосостојба. Во периодот од јуни до декември 2017 година, во Струмица, Куманово, Виница и Штип, дечињата беа вклучени во спортски активности, креативни работилници, хуманитарни продажни изложби, психолошка поддршка и едукации за децата и родителите на децата, многу патувања, другарувања и летен одмор.

„Општествено одговорното работење на Макпрогрес кое се практикува како неделив дел од бизнис постоењето на компанијата, со овој и со многу други проекти, допринесува за развој и благосостојба на луѓето во заедницата. Макпрогрес не останува само давател на донација туку и траен партнер на Црвениот Крст во подобрување на социјализација на деца и млади со посебни потреби. Воедно, им благодариме на сите што се вклучија во активностите на проектот и несебично издвоија од своето време и труд, за успешна реализација“ – изјави Марина Андреева, маркетинг координатор во Макпрогрес.

„Финансиската поддршка што доаѓа од бизнис секторот е добредојдена и без нивна помош тешко дека можеме да реализираме вакви проекти“ - истакна Дејан Здравков, раководител на Дневен центар, Штип.

Сите реализирани активности, беа финансиски и организациски поддржани од компанијата Макпрогрес со што оваа компанија и понатаму продолжува да биде пример за општествено одговорно работење. Во имплементација беа вклучени и вработените на компанијата, како и социјално одговорни граѓани, вработените во дневните центри и родителите на децата.