Свечено отворени вратите на Клубот за млади во рамките на проектот за Социјална инклузија и економско зајакнување на млади

Детали

среда, 28 март 2018

Свечено отворени вратите на Клубот за млади, кој во рамките на проектот за Социјална инклузија и економско зајакнување на млади ќе функционира во рамките на Ресурсниот центар на СОС Детско село Македонија.

Од 2016 година СОС Детско Село Македонија работи на зајакнување на капацитетите и компетенциите на младите невработени лица од општина Гази Баба со цел зголемување на нивната вработливост.

На младите невработени лица им е овозможено бесплатно да посетуваат обуки и курсеви за занаети, за зајакнување на нивните меки вештини, финансиска писменост, учење на странски јазици, учење на основни компјутерски вештини, обуки за развој на мал бизнис и изработка на бизнис план.

За реализација на овие активности, со финансиска помош на Германското министерство за економска соработка и развој и со поддршка од општина Гази Баба отворен е овој Ресурсен Центар од каде со сервисите на СОС Детско Село Македонија се овозможува директна поддршка на лица кои се во социјален ризик.

Во овој клуб се добредојдени сите млади невработени лица од оваа општина. Работата на клубот ќе ја водат волонтери чија задача ќе биде да го  промовираат истиот, да вршат прием на нови корисници, нивно упатување и ориентација. Клубот на млади ќе функционира на принцип „од млади за млади“, т.е самите млади луѓе од општина Гази Баба ќе ја обликуваат работата на клубот и врз основа на нивни предлози и потреби ќе се формираат и активностите.

Клубот ќе работи секој ден и ќе биде отворен за заедницата. Младите корисници ќе имаат поддршка и мотивирање од страна на млади луѓе со слични искуства. Успешните млади луѓе ќе ги споделуваат своите искуства и впечатоци со корисниците преку презентации, кратки семинари, работилници и групи за поддршка.

„Од секојдневната комуникација со корисниците дојдовме до сознание дека особено е важно услугите, обуките и курсевите кои се нудат на невработени лица да бидат лоцирани во самата населба каде што живее социјално ранливо население заради обезбедување висок опфат, учество и посетеност. Поради тоа Клубот за Млади е лоциран во самиот Ресурсен Центар со што ја збогатуваме понудата на услуги за младите кои се во социјален ризик во нивната заедница и општина.“ - изјавија од СОС Детско Село Македонија.

Присутните најпрво ги поздрави претседателката на Управниот одбор на СОС Детско село Македонија, Зорица Серафимовска Арсовскa:

„Во Клубот на млади – Youth Hub младите невработени лица од општина Гази Баба ќе добијат можност и ќе бидат поттикнати  активно да се вклучат, со што ќе се зголеми свесноста на младите, ќе се промовираат успешни приказни, ќе се споделуваат информации и знаење помеѓу врсниците, ќе се мотивираат и ќе се зголеми нивната самодоверба. Младите со учество во младинскиот клуб ќе ги откријат своите афинитети, ќе се вмрежат, ќе остварат нови врски и ќе откријат нови можности за учење и за делување.“

Градоначалникот на Општина Гази Баба, поздравувајќи го отворањето на Клубот, во оваа прилика нагласи: Општината како општествено корисна инстиутуција, постојано ги поддржува Проектите кои се однесуваат на младите лица.  Поддршката во работата на Ресурсниот центар,  сега се проширува и на Клубот на млади, каде  ќе има мотивациски и стручни предавања, поврзани со кариера и вработување, каде ќе се одржуваат работилници, презентации и предавања од интерес на младите, а исто така и ќе се овозможува дружење преку слободни активности.

Повеќе информации може да добиете и на телефонскиот број на Ресурсниот центар 071 370 150.